«Հայաստան» համահայկական հիմնադրամից տեղեկացանք, որ հիմնադրամի Ֆրանսիայի տեղական մարմինը Լեռնային Ղարաբաղի Շուշի քաղաքում կառուցում է արհեստագործական ուսումնարան: Կրթօջախը կյանքի կկոչվի Եզնիկ Մոզյանի կտակած գումարներով ու կկրի ֆրանսահայ բարերարի անունը:
Նորակառույցը նախատեսված է 225 ուսանողի համար եւ կունենա հանրակրթական առարկաների ու արհեստների ուսուցման համար անհրաժեշտ բոլոր հարմարությունները:
Ուսումնարանում եռամյա կրթություն ստանալուց հետո փականագործի, մետաղագործի, ներկարարի, տանիքագործի եւ այլ մասնագիտությունների գծով պատրաստված արհեստավորները կհամալրեն տեղի աշխատանքային շուկան, որտեղ նկատվում է հենց այս մասնագետների կարիքը:
Ի. Պ.