Օրերս Ազգային գրադարանում նշվեց հայ մեծանուն գրող Դերենիկ Դեմիրճյանի 135-ամյակը: Միջոցառմանը ներկա էին գրողի անունը կրող դպրոցի սաները, նրա տուն-թանգարանի տնօրեն Կարինե Ռափայելյանը, բանասիրական գիտությունների դոկտոր Մարգարիտա Խաչատրյանը եւ Դեմիրճյանի ստեղծագործությունների սիրահարները: «Դեմիրճյանի 135-ամյակը պետք է տոնել ամբողջ հանրապետությունով, եւ դա պետք է ոչ թե Դեմիրճյանին, այլ մեզ, որպեսզի մենք դրանով արժեւորենք ինքներս մեր գոյությունը, մեր ազգային պատկանելիությունը», ասաց տուն-թանգարանի տնօրեն Կարինե Ռափայելյանը :
Դեմիրճյանի ծննդյան օրվան նվիրված միջոցառումների շարք նրա` ոչ այնքան բարվոք վիճակում գտնվող տուն-թանգարանում սկսվել է հունվարի 27-ից: Ազգային գրադարանում ցուցադրության էին հանվել նրա ստեղծագործությունները: «Իմ 20-ամյա գրականագիտական աշխատանքի ընթացքում ես առանձնացրել եմ Դեմիրճյանի մարդկային եւ գրական մի քանի առանձնահատկություն: Առաջինը նրա չափից ավելի անկեղծ լինելն է: Երկրորդը` խիզախությունը: Նա իր ամենամեծ սխրանքներից մեկը գործեց, երբ գրեց «Ազգային խայտառակություն» վեպը: Մյուս հատկանիշը, որով առանձնանում է Դեմիրճյանը, մարդու ներքինի քննությունն է: Նրա «Քաջ Նազարը» ներքին մարդու բացառիկ քննություն է», ասաց դեմիրճյանագետ Մարգարիտա Խաչատրյանը :
Գրականագետը միջոցառմանը դատարկաձեռն չէր եկել: Նա բերել էր Դեմիրճյանի ստեղծագործությունների 12-հատորանոց ակադեմիական տպագրության մեջ չմտած, դեռեւս անտիպ «Տանը» պատմվածքը, որն էլ ընթերցեց հավաքված հյուրերի համար:
Դեմիրճյանը հոգեբանական խոր վերլուծությունների միջոցով կարողացել է թափանցել հերոսների ներաշխարհը եւ նշել մարդկայինի ու անմարդկայինի սահմանագիծը:
Ցերեկույթին ներկա դպրոցականները փոքրիկ ներկայացում էին պատրաստել` ցուցադրելով Դեմիրճյանի` «ոչ այնքան մոդայիկ» համարվող գործերից հատվածներ:
ՆԱԻՐԱ ՎԵՐԴՅԱՆ