ՀՀ մշակույթի նախարարությունում «Արմմոնո» միջազգային թատերական փառատոնի մեկնարկից առաջ լրագրողների հետ հանդիպեցին Լիտվայի մշակույթի փոխնախարար Դեւիդաս Ստանպոնկուսը , Լիտվայի մշակույթի նախարարության կանցլեր տկն. Նոմեդա Զենկենեն , ՀՀ-ում Լիտվայի արտակարգ եւ լիազոր դեսպան Գեդրիուս Ապուոկասը , Լիտվայի եւ ԽՍՀՄ վաստակավոր արտիստ Ռեգիմանտաս Ադոմայտիսը, Հայաստանի թատերական գործիչների միության նախագահ Հակոբ Ղազանչյանը , «Արմմոնո» փառատոնի տնօրեն Մարիաննա Մխիթարյանը : Փառատոնի կազմակերպիչները տեղեկացրին, որ փետրվարի 29-ից մարտի 5-ը ընթացող փառատոնին կհյուրընկալվեն ռուս հանրահայտ թատերագետ Էլեոնորա Մակարովան , բելառուս հայտնի թատերագետ Լենա Լիոպոն, վրացի թատերական պրոդյուսեր Նինո Լապիաշվիլին, Վրոցլավի (Լեհաստան) մոնոներկայացումների միջազգային փառատոնի տնօրեն Վեցլավ Գերասը, Քիլի (Գերմանիա) մոնոներկայացումների միջազգային փառատոնի տնօրեն Իոլանտա Զուտովիչը, Խմելնիցկիի (Ուկրաինա) մոնոներկայացումների միջազգային փառատոնի նախագահ Նինա Մազուրը, Ուլյանովսկի Ի. Գոնչարովի անվ. դրամատիկական թատրոնի տնօրեն Նինա Նիկոնորովան եւ ուրիշներ:
Հոբելյանական փառատոնի առանցքն է կազմելու լիտվական ծրագիրը, որը նվիրված կլինի նաեւ մեր երկու երկրների միջեւ դիվանագիտական կապերի հաստատման 20-ամյակին: Փառատոնի մեկնարկը տրվեց Կ. Ստանիսլավսկու անվան ռուսական դրամատիկական թատրոնում ԽՍՀՄ ժողովրդական արտիստ Ռեգիմանտաս Ադոմայտիսի ծննդյան 75-ամյա հոբելյանին նվիրված ստեղծագործական երեկոյով:
Մ. Մ.