Երեկ ամփոփվեց «Հայսուպերսթար-5» երրորդ գալա-համերգի արդյունքները: «Ազգը», համագործակցելով «Շանթ» հեռուստաընկերության «Հայսուպերսթար-5» նախագծի հետ, որպես ինֆորմացիոն գործընկեր, հրավիրվել էր ներկա գտնվելու երրորդ գալա-համերգի արդյունքների ամփոփմանը: Համերգին մասնակցած 9 մասնակիցներն էլ անկեղծորեն ասացին, որ 60-70-ականներին ստեղծված եւ սիրելի հիթեր դարձած երգերն այնքան էլ իրենց հոգուն հարազատ չէին եւ գրեթե բոլորը դժգոհ էին իրենց ելույթից: Սակայն նախնական հարցման ժամանակ քչերը կարողացան իրենց կարծիքը հայտնել, թե ո՞ւմ ելույթն էր թույլ եւ ո՞վ դուրս կմնա ծրագրից: Ժյուրիի անդամների կարծիքներն էլ կիսով չափ էին համընկնում եւ նրանք էլ դժգոհ էին այդ տարիների հրաշալի ու սիրված երգերը լավ չմատուցելուց: Ինչեւէ, ժյուրիի անդամներ Լեյլա Սարիբեկյանը, Գարիկ Պապոյանը, Մարտին Ահարոնյանը եւ Անդրեն ամենաթույլ կատարում համարեցին Էլիզաբեթ Ադիկյանի «Քեզ հետ, իմ սեր» երգի մատուցումը, իսկ Ավետ Բարսեղյանի կարծիքով, թույլ ելույթը Արմեն Մարդանյանինն էր, «Ով սիրո~ւն, սիրո~ւն» երգի մատուցմամբ: Ի վերջո հեռուստադիտողների ձայների քվեարկության արդյունքում վտանգավոր գոտում էին հայտնվել Էլիզաբեթ Ադիկյանը, Անահիտ Հարությունյանը եւ Արմեն Մարդանյանը: Ընդհանուր հաշվարկով ծրագրից դուրս մնաց մասնակից Արմեն Մարդանյանը ՌԴ-ից` իր օգտին քվեարկողների 6,1 տոկոս հավաքած ձայներով: Արմենը հրաժեշտից առաջ մեկ անգամ եւս ներկայացրեց «Ով սիրո~ւն, սիրո~ւն» երգը ու գրկախառնվելով ընկերների հետ, հրաժեշտի լուսանկարներ ու հարցազրույցներ տվեց:
«Ազգի» հետ զրույցում իմ այն հարցին, թե ի՞նչ տվեց իրեն այս նախագիծը, Արմենն ասաց. «Երաժշտությունն իմ հոգու մեջ է: Անկախ այն բանից, որ ես դուրս մնացի նախագծից, այն ինձ համար դարձավ մի փորձություն եւ ես գիտեմ, թե ինչ պետք է անեմ այս կյանքում: Երաժշտությունն իմ կյանքի ուղին է, որը հաստատվեց այս նախագծով, որի համար շնորհակալ եմ «Շանթ» հեռուստաընկերությանն ու նախագծի կազմակերպիչներին: Ընկերներիս մաղթում եմ հաջողություն ու կարծում եմ, որ կհաղթի լավագույնը»:
Հիշեցնենք, որ առջեւում է «Հայսուպերսթար-5» չորրորդ գալա-համերգը, որին կմասնակցի արդեն առողջացած Ջուլիետտա Սարգսյանը:
ՄԱՐԻԵՏԱ ՄԱԿԱՐՅԱՆ