Շաբաթ փետրուարի 25-ին, Փարիզի Ս. Յովհաննէս Մկրտիչ մայր եկեղեցու «Նուրհան Ֆրենկեան» սրահում գումարուեց Ֆրանսայի Հայոց թեմի թեմական պատգամաւորական արտահերթ ժողով, որի պատճառը Նիսի կրօնական ընկերակցութեան վարչութեան նախկին անդամների յարուցած ճգնաժամն է Նիսի հայ համայնքում: Ժողովից առաջ Ատենապետ պրն. Արա Տէյիրմենճեանը քվորում ապահովելու նպատակով հաշուեց ներկաների թիւը: Թեմի 52 պատգամաւորներից ներկայ էին 37-ը, որի հիման վրայ ատենապետը ժողովը յայտարարեց բացուած: Ժողովը սկսուեց Ֆրանսայի Հայոց թեմի առաջնորդ Տ. Նորվան արք. Զաքարեանի աղօթքով:
Առաջնորդ Սրբազան հայրը անդրադառնալով ժողովի օրակարգին` նշեց, որ Նիսի կրօնական ընկերակցութեան վարչութեան նախկին անդամները շարունակում են ընդվզել եւ յամառօրէն դէմ լինել Ֆրանսայի Հայոց թեմի թեմական կառոյցին: Սրբազան հայրը մանրամասն անդրադարձաւ թեմի ստեղծման օրուանից թեմական կառոյցի հանդէպ Նիսի կրօնական ընկերակցութեան վարչութեան դրսեւորած ապակառուցողական կեցուածքին եւ ինքնագլուխ գործունէութեանը: Նշուեց, որ բոլոր անհրաժեշտ միջոցները ձեռնարկուել են` լուծելու խնդիրը, սակայն, դժբախտաբար, Նիսի վարչութեան անդամների ժխտական կեցուածքը եւ ապակառուցողական մօտեցումը թեմական կառոյցի հանդէպ չփոխուեց եւ մնաց նոյնը:
Ժողովի ընթացքին հանդէս եկան նաեւ Թեմական պատգամաւորական ժողովի ատենապետ Արա Տէյիրմենճեանը, Թեմական խորհուրդի ատենապետ պրն. Փաթրիս Ճոլոլեանը եւ Թեմական խորհուրդի փոխատենապետ պրն. Գէորգ Աբգարեանը: Վերջիններս հաստատեցին, որ բազմիցս հանդիպումներ են ունեցել Նիսի կրօնական ընկերակցութեան նախկին անդամների հետ` փորձելով փոխհասկացողութեամբ եւ փոխզիջումներով խնդիրը առաջնորդել լուծման, սակայն ապարդիւն, Նիսի նախկին վարչութեան կողմից խնդիրը լուծելու պատրաստակամութիւն եւ փոխհասկացողութիւն բացարձակապէս չի դրսեւորուել: Ներկայացուեցին վերջին շրջանի այն բոլոր փաստաթղթերը եւ նամակագրութիւնը, որոնք առնչւում էին խնդրի կարգաւորման գործընթացին:
Առաջնորդ սրբազան հայրը ժողովականներին տեղեկացրեց, որ 24 յունուար 2012 թուակիր գրութեամբ դիմել է Վեհափառ հայրապետին` տեղեկացնելով Նիսի կրօնական ընկերակցութեան վարչութեան նախկին անդամների` Նիսի հայ համայնքում առաջացրած ճգնաժամը յաղթահարելու նպատակով ընդունելի լուծման գալու անհնարինութեան մասին: Ներկայացուեց Մայր աթոռ Սուրբ Էջմիածնում գումարուած Գերագոյն հոգեւոր խորհուրդի 26 յունուար 2012 թուակիր ժողովի որոշումը, որով Գերագոյն հոգեւոր խորհուրդը զրկում է Նիսի կրօնական ընկերակցութիւնը «Հայ առաքելական եկեղեցի» անուանումից եւ լիազօրում է Հայ առաքելական եկեղեցու Ֆրանսայի Հայոց թեմին ձեռնարկել բոլոր, ներառեալ իրաւաբանական միջոցները` զրկելու Նիսի կարծեցեալ կրօնական ընկերակցութիւնը Հայ առաքելական եկեղեցին ներկայացնելու բոլոր իրաւունքներից: Նիսի կրօնական ընկերակցութիւնը այլեւս իրաւունք չունի ներկայացնելու Հայ առաքելական եկեղեցին, կազմակերպելու եւ անցկացնելու Հայ առաքելական եկեղեցու ծիսապաշտամունքային արարողութիւնները, ինչպէս նաեւ կրօնական ընկերակցութեանը պատկանող բոլոր իրաւասութիւնները:
Յաւարտ քննարկութեանց ժողովի ատենապետ պրն. Արա Տէյիրմենճեանը քուէարկութեան ներկայացրեց երկու որոշում:
Ա որոշում . Հիմք ընդունելով Հայ առաքելական եկեղեցու Գերագոյն հոգեւոր խորհրդի Յունուար 26, 2012 թուակիր որոշումը, որով Նիսի կրօնական ընկերակցութիւնը զրկւում է Հայ առաքելական եկեղեցու անունը կրելու իրաւունքից, Ֆրանսայի Հայոց թեմի թեմական պատգամաւորական փետրուար 25, 2012 թուակիր ժողովը քուէարկեց մի որոշում, որով յիշեալ կրօնական ընկերակցութիւնը հեռացւում է Ֆրանսայի Հայոց թեմից` հաշուի առնելով, որ այն այլեւս չի համապատասխանում թեմական կառոյցի սկզբունքներին:
Առաջին որոշումն ընդունուեց 2 դէմ, 2 ձեռնպահ եւ 33 կողմ ձայների մեծամասնութեամբ:
Բ որոշում . Հիմք ընդունելով Հայ առաքելական եկեղեցու Գերագոյն հոգեւոր խորհրդի յունուար 26, 2012 թուակիր որոշումը, որով Ֆրանսայի Հայոց թեմը լիազօրւում է ձեռնարկել բոլոր, ներառեալ նաեւ իրաւաբանական միջոցները` զրկելու Նիսի նախկին կրօնական ընկերակցութիւնը Հայ առաքելական եկեղեցին ներկայացնելու բոլոր իրաւունքներից, Թեմական պատգամաւորական ժողովը յանձնարարում է Թեմական խորհուրդին` պատրաստել գործողութիւնների փաթեթ, որով Նիսի նախկին կրօնական ընկերակցութեանը պատկանող անշարժ եւ շարժական գոյքը, վարչական եւ իրաւական փաստաթղթերը եւ բոլոր իրաւասութիւնները պէտք է յանձնուեն Նիսի նոր հիմնուած կրօնական ընկերակցութեանը: Թեմական խորհուրդի պատրաստած փաթեթը Թեմական պատգամաւորական ժողովը պէտք է քննութեան առնի իր յաջորդ ժողովի ժամանակ:
Երկրորդ որոշումը ընդունուեց 2 դէմ, 1 ձեռնպահ եւ 34 կողմ ձայների մեծամասնութեամբ:
Ժողովը փակուեց Սրբազան հօր աղօթքով:
Հ. Պ.