Հաշվի առնելով եղանակային անբարենպաստ պայմանները, որոնց պատճառով խաղադաշտերը դեռ պատրաստ չեն ֆուտբոլային հանդիպումների անցկացման համար, ՀՖՖ-ն հետաձգել է մարտի 24-ին եւ 25-ին կայանալիք Հայաստանի բարձրագույն խմբի առաջնության մեկնարկային տուրի հանդիպումները: Այսպիսով, ՀՀ 21-րդ առաջնությունը կմեկնարկի մարտի 31-ին կայանալիք 2-րդ տուրի հանդիպումներով:
Ինչպես հայտնի է, այս տարվա առաջնությունն անցկացվելու է 6 շրջանով եւ 2012-ին նախատեսված 32-րդ տուրի հանդիպումները նշանակված են դեկտեմբերի 1-ին եւ 2-ին: Հետաքրքրական է, թե այդ ժամանակ ինչպիսի՞ն կլինեն եղանակային պայմանները եւ արդյոք հնարավոր կլինի՞ անցկացնել հանդիպումները, թե՞ կրկին անհրաժեշտ կլինի հետաձգել խաղերը: Ավելորդ չէ նշել նաեւ, որ 2013-ին առաջնությունը վերսկսվելու է ավելի վաղՙ մարտի սկզբներին: Ամենայն հավանականությամբ, դաշտերի հետ կապված նույն հիմնախնդիրները ծագելու են նաեւ հաջորդ գարնանը: