ՖԻԴԵ-ն փոփոխել է շախմատի աշխարհի չեմպիոնի տիտղոսի հավակնորդների մրցաշարի անցկացման ժամկետները: Մրցաշարը կանցկացվի 2013-ի մարտի 13-31-ը Լոնդոնում: Հիշեցնենք, որ նախապես որոշված էր, որ հավակնորդների մրցաշարն անցկացվելու է այս տարվա հոկտեմբերի 23-ից նոյեմբերի 13-ը:
Հավակնորդների մրցաշարի անցկացման ժամկետի փոփոխման խնդրանքով ՖԻԴԵ-ին էր դիմել «Մեծ սաղավարտ» մրցաշարի կազմկոմիտեն, քանի որ հավակնորդներից մի քանիսը, այդ թվում նաեւ Լեւոն Արոնյանը, չէին հասցնի հանգստանալ ու հանդես գալ նաեւ այդ մրցաշարում: Եվ ՖԻԴԵ-ն ընդառաջելով խնդրանքը, փոխեց ժամկետը:
Տեղեկացնենք, որ շախմատի աշխարհի թագի համար Բորիս Գելֆանդն ու Վիշվանաթան Անանդը կպայքարեն Մոսկվայում, այս տարվա մայիսի 10-30-ը: Շախմատի համաշխարհային օլիմպիադան տեղի կունենա Ստամբուլում օգոստոսի 27-ից սեպտեմբերի 10-ը: Շախմատի Գրան պրիի հերթական փուլերը կկայանան սեպտեմբերի 19-ից հոկտեմբերի 3-ը Չելյաբինսկում եւ նոյեմբերի 21-ից դեկտեմբերի 4-ըՙ Տաշքենդում: