Ռուսաստանի Դաշնության կառավարության ղեկավար եւ ընտրյալ նախագահ Վլադիմիր Պուտինը ապրիլի 15-ին շնորհավորել է Ռուսաստանի հայերի միության եւ Համաշխարհային հայկական կոնգրեսի նախագահ Արա Աբրահամյանին ` 55-ամյա հոբելյանի կապակցությամբ:
Շնորհավորական հեռագրում Պուտինը նշել է. «Ձեզ իրավամբ համարում են գունեղ, տաղանդավոր մարդ` օժտված ստեղծագործ, արարիչ էներգիայի հսկայական պաշարով: Որպես Ռուսաստանի հայերի միության նախագահ Դուք նշանակալի անձնական ներդրում ունեք Ռուսաստանի եւ Հայաստանի ժողովուրդներին դարեդար կապող` բարեկամության ու բարիդրացիության հիանալի ավանդույթների պահպանման ու հարստացման գործում»:
Ռուսաստանի վարչապետը հեռագրում մասնավորապես նշել է. «Շատ դեպքերում Ձեր, Ձեր աշխատասիրության եւ համառության շնորհիվ հայկական սփյուռքը արգասաբեր մասնակցություն ունի մեր երկրի կյանքում, տնտեսության ու սոցիալական ոլորտի, մշակույթի ու կրթության զարգացման գործում` զգալի աշխատանք տանելով Ռուսաստանում ազգամիջյան խաղաղության ու համերաշխության ամրապնդման համար»: