«ԱԶԳ» ՕՐԱԹԵՐԹ

ՀՀ ԿԱՌԱՎԱՐՈՒԹՅԱՆ ԳՈՅԱԲԱՆԱԿԱՆ ՍԿԶԲՈՒՆՔՆԵՐԸ

Գիտաժողովի բացմանը ելույթ ունենալով մասնակիցներիՙ հայ եւ օտարազգի գիտնականների առջեւ, նրանց ողջունելուց եւ հաջողություն մաղթելուց հետո, ՀՀ վարչապետ Տիգրան Սարգսյանը հետեւյալ խոսքերով ներկայացրեց գոյաբանական այս սկզբունքները, որոնցով ղեկավարվում է իր գլխավորած կառավարությունը:

Թեման, որ մենք այսօր ձեզ հետ միասին պետք է քննարկենք, ունի մի շարք առանձնահատկություններ:

Ես ցանկանում եմ ձեր ուշադրությանը ներկայացնել այն գոյաբանական սկզբունքները, որոնցով ղեկավարվում է ՀՀ գործադիր իշխանությունը, եւ բարձրացնել հարցեր, որոնց պատասխաններն ակնկալում ենք ստանալ այստեղ ներկա գիտնականներից:

Համաշխարհային ճգնաժամն առավել սուր ձեւով է ներկայացնում փոխակերպվող հասարակության խնդիրները եւ պահանջում արդյունավետ լուծումներ, որոնք թույլ չեն նվազեցնել քաղաքացիների կենսամակարդակը:

Մյուս կողմից` քաղաքական գործիչները քաջ գիտակցում են, որ գիտությունն ի վիճակի չէ պատասխանելու շատ հարցերի:

Մենք փորձել ենք դուրս բերել այն հիմնարար, կարեւորագույն առանձնահատկությունները, որոնք բնորոշում են մեր ներկան:

Առաջին` մենք ապրում ենք մի աշխարհում, որի առաջնային բնութագրիչը արագ փոփոխությունն է: Երբեւէ մարդկությունը չի ապրել այնպիսի ժամանակներում, երբ փոփոխություններն այդքան ակնհայտ են: Մի սերունդը չի հասցնում ամբողջությամբ այն յուրացնել, հասկանալ հենքային գործընթացները, բացահայտել օրինաչափություններ, դրանից ելնելով ձեւակերպել խնդիրներ եւ դրանց լուծումներ տալ:

Ժամանակակից աշխարհի երկրորդ առանձնահատկությունն այն է, որ էապես ուժգնացել են փոխադարձ ազդեցությունները: Աշխարհն այսօր շատ ավելի բաց է, քան քսան կամ հիսուն տարի առաջ. պետությունների փոխազդեցություններն էական նշանակություն ունեն:

Երրորդ առանձնահատկությունն այն է, որ ակնհայտորեն ձեւավորվում է որակապես նոր տիպի հասարակություն, որին շատ հաճախ անվանվում են պոստինդուստրիալ:

Հասարակության հիմնական հարաբերությունների ձեւավորման առանցքում պետք է լինի ոչ թե ապրանքների, այլ գիտելիքի արտադրությունը:

Հաջորդ առանձնահատկությունը բխում է նախորդից. եթե հենքային գործընթացի հիմքում ընկած լինի գիտելիքի արտադրությունը, ապա հասկանալի է, որ հիմնական ռեսուրսը կլինի մարդը: Ժամանակակից կհամարվի այն հասարակությունը, որը կստեղծի առավել բարենպաստ պայմաններ մարդու` նոր գիտելիքներ ստեղծելու համար:

Փոխակեպվող հասարակության մյուս առանձնահատկությունը արժեքային համակարգի ճիշտ կողմնորոշումն է:

Պետք է ճշգրտել ժամանակակից հասարակությանը բնորոշ արժեքները, գրված եւ չգրված կանոնները եւ հասկանալ մարդկության զարգացմանը խոչընդոտող հնամաշ արժեքները:

Կան բավականին բուռն շրջադարձեր, որոնց լուծումները միանաշնակ չեն:

Մենք պետք է համակերպվենք այն մտքին, որ աշխարհը գնում է ոչ միայն միաձուլման եւ միասնական ստանդարտների ներկրման, այլեւ պայքարում է իր տեսակի եւ առնձնահատկությունների` արժեքների համար:

Այդ տեսակետից ազգային մշակույթի զարգացումը, ազգային ինքնության պահպանումը նույնպես ունի ֆունդամենտալ նշանակություն:

Մենք պետք է գտնենք եզրեր փոքրացող աշխարհի միասնական ստանդարտների եւ բազմազանության միջեւ:

Մի քանի տարի առաջ տեղի ունեցած տնտեսագիտության համաշխարհային մեծության ֆինանսական հավաքի ժամանակ բոլոր գիտնականները խոսում էին սպասվելիք ֆինանսական եւ տնտեսական ճգնաժամի մասին: Նրանցից ոչ մեկը համարձակություն չունեցավ բացատրելու դրա հիմնական պատճառները. համերաշխությունը ձեւավորվեց միայն հետեւյալ հարցի շուրջ` ճգնաժամից հետո մենք կբացատրենք, թե որոնք են ճգնաժամի պատճառները եւ ինչ է պետք անել:

Մարդկությունը թեւակոխել է զարգացման մի նոր փուլ, որը ենթադրում է շարունակական փոխակերպումներ:

Այս առանձնահատկությունը մշտապես հետապնդելու է մեզ: Պետք է ստեղծել նախադրյալներ, որ քաղաքացիները պատրաստ լինեն ընկալելու մշտապես փոփոխվող հասարակությանը:

Այդ տեսակետից մեր սպասելիքները գիտաժողովից մեծ են: Բոլորիս ցանկանում եմ բեղմնավոր աշխատանք հավաստիացնելով, որ գիտաժողովի արդյունքները լինելու են Կառավարության ուշադրության կենտրոնում: