2012 թ. ապրիլի 29-ին «Վալլեքս» խմբի ընկերությունները կազմակերպեցին ուսանողական հերթական (7-րդ) շրջայց-ծառատունկը ՀՀ Լոռու մարզում խմբի ընկերությունների գործունեության վայրեր: Ծառատունկին մասնակցեց շուրջ 130 մարդ. ներգրավված էին ՀՀ առաջատար բուհերի ուսանողներ, Թեղուտ եւ Շնող գյուղերի դպրոցների աշակերտներ, «Լոռվա երիտասարդների միասնություն», «Ալավերդու երիտասարդների միասնություն», «Պաշտպանենք Թեղուտը» եւ հասարակական այլ կազմակերպությունների ներկայացուցիչներ, անվանի մտավորականներ:
Շրջայցի առաջին կանգառը Դսեղ գյուղում էր, ուր մասնակիցներն այցելեցին Հովհաննես Թումանյանի տուն-թանգարան, ծաղիկներ դրեցին մատուռին, ուր ամփոփված է Թումանյանի սիրտը եւ մոմեր վառեցին Դսեղի Սուրբ Գրիգոր Լուսավորիչ եկեղեցում:
Շրջայցը շարունակվեց Ալավերդի քաղաքում: Մասնակիցները շրջեցին Ալավերդու պղնձաձուլական գործարանում, դիտեցին ձուլարանի աշխատանքի որոշ դրվագներ, նրանց ընդհանուր գծերով բացատրվեց գործարանի աշխատանքի բնույթն ու առանձնահատկությունները:
Ծառատունկն իրականացվեց Ալավերդուՙ Երկրորդ աշխարհամարտում զոհվածների հիշատակին նվիրված հուշակոթողի հարակից տարածքներում:
Միջոցառումը շարունակվեց Ալավերդու մշակույթի կենտրոնում: Ցուցադրվեց տեղեկատվական ֆիլմ Թեղուտի լեռնահարստացուցիչ կոմբինատի կառուցման եւ պղինձ-մոլիբդենային հանքավայրի շահագործման ծրագրի մասին: Կազմակերպվեց քննարկում, որի շրջանակներում մասնակիցները հնարավորություն ունեցան «Վալլեքս» խմբի գործունեության վերաբերյալ հարցեր ուղղելու խմբի ընկերությունների նախագահ Վալերի Մեջլումյանին եւ ղեկավարության այլ ներկայացուցիչների:
Միջոցառման ավարտը համահունչ էր դսեղյան մեկնարկին. Վանաձորի Հովհաննես Աբելյանի անվան պետական դրամատիկական թատրոնի դերասանները ներկայացրեցին «Հեքիաթներ մեծահասակների համար» թումանյանական մոտիվներով բեմադրությունը:
Հարկ է նշել, որ «Վալլեքս» խմբի կողմից կազմակերպվող ուսանողական ծառատունկերը հասարակական միջոցառումներ են, որոնց կարող են միանալ բոլոր ցանկացողները: Դրանք իրականացվում են ի լրումն Թեղուտի պղինձ-մոլիբդենային հանքավայրի շահագործման ծրագրի իրականացման հետեւանքով անտառային տնտեսությանը հասցվելիք վնասի փոխհատուցման` ՀՀ պետական կառավարման մարմինների հետ համաձայնեցված ծրագրով նախատեսված միջոցառումների:
«Վալլեքս» խմբի ընկերությունների Տեղեկատվության եւ հասարակայնության հետ կապերի բաժին