ԵԱՀԿ Մինսկի խմբի համանախագահներ Իգոր Պոպովը, Ռոբերտ Բրադկեն եւ Ժակ Ֆորը երեկ պետք է այցելեին Ստեփանակերտ` հանդիպելու Լեռային Ղարաբաղի Հանրապետության նախագահ Բակո Սահակյանի հետ: Սակայն այցելությունը չի կայացել եղանակային վատ պայմանների պատճառով` հետաձգվելով մեկ այլ ժամանակի:
Չնայած դրան` համանախագահներն արդեն այսօր կլինեն Երեւանում` հանդիպելու ինչպես հանրապետության նախագահին, այնպես էլ արտաքին գործերի նախարարին: Ամենայն հավանականությամբ, ԵԱՀԿ Մինսկի խմբի համանախագահները Երեւանից հետո կայցելեն նաեւ Բաքու` հանդիպելու ադրբեջանական նախագահի եւ արտգործնախարարի հետ:
Դեռեւս այս տարվա մարտին վերջին այցելությունից հետո համանախագահները ստիպված էին հատուկ հայտարարությամբ անդրադառնալ վերջերս սահմանին տեղի ունեցած միջադեպերին, սակայն հուսանք, որ տարածաշրջան այցելությանն այդ ամենը առավել խոր քննարկման կենթարկվի ու գեթ եզակի անգամ մեղավորն ու սադրիչը հասցեագրված դիտողություն ու զգուշացում կստանան:
Ա. Հ.