«ԱԶԳ» ՕՐԱԹԵՐԹ

https://www.azg.am | WAP | WAP-CULTURE

#83, 2012-05-09 | #84, 2012-05-11 | #85, 2012-05-12


«ՈՍԿԵ ԾԻՐԱՆ» 9-ՐԴ ԵՐԵՎԱՆՅԱՆ ՄԻՋԱԶԳԱՅԻՆ ԿԻՆՈՓԱՌԱՏՈՆԸ ԱՅՍ ՏԱՐԻ ԵՎՍ ՀԱՐՈՒՍՏ ՈՒ ՀԵՏԱՔՐՔՐԱԿԱՆ ԾՐԱԳՐԵՐ ԿՈՒՆԵՆԱ

ՎիվաՍել-ՄՏՍ-ն անընդմեջ 7-րդ տարին ստանձնում է «Ոսկե ծիրան» երեւանյան միջազգային կինոփառատոնի գլխավոր հովանավորությունը

ՀՀ մշակույթի նախարարությունում կայացավ համատեղ մամուլի ասուլիս` նվիրված «Ոսկե ծիրան» երեւանյան միջազգային կինոփառատոնին: Մամուլի ասուլիսին մասնակցեցին ՀՀ մշակույթի նախարար Հասմիկ Պողոսյանը, ՎիվաՍել-ՄՏՍ-ի գլխավոր տնօրեն Ռալֆ Յիրիկյանը, «Ոսկե ծիրան» երեւանյան միջազգային կինոփառատոնի տնօրեն Հարություն Խաչատրյանը, փառատոնի ծրագրերի տնօրեն Միքայել Ստամբոլցյանը եւ փառատոնի գեղարվեստական տնօրեն Սուսաննա Հարությունյանը:

«Ոսկե ծիրան» 9-րդ երեւանյան միջազգային կինոփառատոնը տեղի կունենա 2012թ. հուլիսի 8-15-ը: Այս տարի եւս փառատոնի կողքին են գլխավոր հովանավոր ու հավատարիմ գործընկեր ՎիվաՍել-ՄՏՍ ընկերությունը եւ ՀՀ մշակույթի նախարարությունը:

Այս տարի փառատոնն ստացել է 1020 հայտ (անցյալ տարի` մոտ 700 հայտ)` աշխարհի շուրջ 70 երկրից, ինչը վկայում է «Ոսկե ծիրան»-ի հանդեպ տարեցտարի աճող հետաքրքրության մասին: Այս մասին է վկայում նաեւ փառատոնին հանրահայտ կինոգործիչների ներկայությունը, ինչն արդեն դարձել է «Ոսկե ծիրան»-ի ամենասպասված ավանդույթներից մեկը: Այս տարի փառատոնի ժյուրիի նախագահը իսպանացի հայտնի կինոռեժիսոր, 2010թ. Կաննի կինոփառատոնի գլխավոր ժյուրիի կազմի անդամ Վիկտոր Էրիսեն է: Երեւանի` գրքի համաշխարհային մայրաքաղաքի հռչակման առիթով «Ոսկե ծիրան» կ/փ-ը 2012թ-ին կներկայացնի նոր ծրագիր` «Գիրք եւ կինո» խորագրով: Ծրագրում ընգրկվելու են հայ եւ համաշխարհային դասական ստեղծագործությունների էկրանավորումները:

Մրցութային ծրագիրը 2012թ-ին կպահպանի 4 մրցույթները` «Միջազգային խաղարկային», «Միջազգային վավերագրական», «Հայկական համայնապատկեր» եւ «Կորիզ». վերջինս մեկնարկել է 2011թ-ին եւ անդրադառնում է երիտասարդ կինոռեժիսորների կարճամետրաժ ֆիլմերին: Հարուստ ֆիլմացանկով կներկայանան «Երեւանյան պրեմիերաներ», «Հետահայաց ցուցադրություններ» եւ «Հարգանքի տուրք» ծրագրերը, որոնցում սպասվում են մի շարք անակնկալներ համաշխարհային կինոյի վարպետներից: Մասնավորապեսՙ «Հարգանքի տուրք» ծրագրի շրջանակներում կիրականացվեն Յուրի Երզնկյանի 90-ամյակին («Յուրի Երզնկյանը եւ իր աշակերտները») եւ Ֆրունզե Դովլաթյանի 85-ամյակին նվիրված ցուցադրություններ: Հատուկ կարեւորությամբ կնշվի Անդրեյ Տարկովսկու 80-ամյակը:

Փառատոնի շրջանակներում արդեն 6-րդ անգամ կկազմակերպվի «Ռեժիսորներ առանց սահմանների» համատեղ արտադրության ֆորումը, որը «Ռեժիսորներ առանց սահմանների» Արեւելյան գործընկերության ծրագրի մի մաս է եւ իրագործվում է Եվրոմիության աջացությամբ: Ավելի մանրամասն ծրագրի մասին կներկայացվի գալիք մամլո ասուլիսի ընթացքում:

Մինչեւ փառատոնի սկսվելը ծրագրվում է իրականացնել նաեւ «Կինոլրագրություն առանց սահմանների» խորագրով դասընթաց միջազգային բարձրակարգ մասնագետների եւ Արեւելյան գործընկերության երկրներից ժամանած երիտասարդ կինոգետների, կինոքննադատների մասնակցությամբ: Վրջիններիս համատեղ ուժերով փառատոնի օրերին կտպագրվի «Ոսկե ծիրան» ամենօրյա պարբերականը:


© AZG Daily & MV, 2009, 2011, 2012, 2013 ver. 1.4