Մայիսի 23-ի առավոտյան Ախուրյանի տարածաշրջանի Ջրառատ գյուղի ծայրամասում, գյուղի բնակիչ Իսրայելյանների անասնագոմում հայտնաբերվել է գիշերը գայլերի հարձակման հետեւանքով բզկտված ու սատկած 28 ոչխար եւ 4 այծ: Եվս 4 ոչխար ստացած վերքերից անկել են ժամեր անց: Տանտերը` Փայլակ Իսրայելյանը, հավաքված գյուղացիներին ու դեպքի վայր ժամանած մարզպետարանի մասնագետներին պատմել է, որ նախորդ օրը երեկոյան կողմ դիմացի սարին նշմարվել են մի քանի գայլեր, բայց ոչ ոքի մտքով չի անցել, որ նման ջարդ տեղի կունենա:
Իսրայելյանների վեց անձից բաղկացած կարիքավոր ընտանիքը, որի կազմում են երկու անչափահաս երեխաները, տանտիրոջ տարեց մայրն ու հիվանդ քույրը, իր հոգսերը հոգալու համար անցյալ տարի մոտ 30 գլուխ ոչխար է ձեռք բերել վարկի միջոցով, ինչպես նաեւ անասնակեր: Կորստի ընդհանուր գումարը շուկայական գներով հաշվվում է 1,5 մլն դրամ:
Գ. Մ.