Բուլղարիայի «Ոսկե ավազներ» առողջարանում վերջնագիծը հատեց շախմատի միջազգային մրցաշարը, որի մրցանակային ընդհանուր հիմնադրամը 50 հազար 300 եվրո էր: Այն բաշխվեց մրցաշարի 95 մասնակիցների միջեւՙ ելնելով ցույց տված արդյունքներից:
Մրցաշարին մասնակցող հայ շախմատիստներից լավագույն արդյունքը ցույց տվեց Հրանտ Մելքումյանը, որը 9 հնարավորից վաստակած 7 միավորով զբաղեցրեց 6-րդ տեղը եւ արժանացավ 1500 եվրո պարգեւավճարի: 9-րդ տուրում Հրանտը սեւերով հաղթեց Բորիս Էսենին: Հայ շախմատիստը միայն կես միավորով զիջեց մրցաշարի հաղթող, չինացի շախմատիստ Շանգլեյ Լուին, որը հաղթելով Վլադիմիր Հակոբյանին, վաստակեց 7,5 միավոր: Փաստորեն Հրանտը միայն լրացուցիչ գործակիցներով զիջեց իր հետ հավասար միավորներ վաստակած ռումինացի Լեւենտե Վայդային, շվեդ Հանս Տիկանենին, ուկրաինացի Զախար Եֆիմենկոյին եւ Թուրքիան ներկայացնող Ալեքսանդր Իպատովին:
Վլադիմիր Հակոբյանի համար չինացուց կրած պարտությունը ճակատագրական եղավ: Այլապես նա կարող էր մրցանակակիր դառնալ: Հակոբյանը, որ մինչ այդ Ալբենայում հաղթող էր ճանաչվել, այս մրցաշարում 6 միավորով բավարարվեց 25-րդ տեղով: Նա այս անգամ ընդամենը 200 եվրոյի արժանացավ:
Ավելի հաջող էր Տիգրան Պետրոսյանի եւ Ավետիք Գրիգորյանի ելույթը, որոնք վաստակեցին 6,5-ական միավոր: Տիգրանը հաղթեց Ալին-Միլե Բերեզկուին եւ գրավելով 12-րդ տեղը, 500 եվրո պարգեւավճար ստացավ: Իսկ ահա Ավետիքը ոչ-ոքի խաղալով Գենադի Տունիկի հետ, զբաղեցրեց 19-րդ տեղը եւ 300 եվրո ստացավ:
Հովհաննես Գաբուզյանն ու բրազիլահայ Գրիգոր-Սեւակ Մխիթարյանը 6-ական միավորով զբաղեցրին համապատասխանաբար 31-րդ եւ 35-րդ տեղերը: Երկուսն էլ մրցաշարն ավարտեցին հաղթանակով: Գաբուզյանը հաղթեց Իվան Չեպարինովին, Մխիթարյանը պարտության մատնեց Ազիզ Նեզադ Հուսեյնին: 5,5-ական միավորով Կարեն Գրիգորյանը 41-րդն էր, Հրայր Սիմոնյանըՙ 43-րդը: Բուլղարահայ Վալենտին Փամբուկչյանը 4 միավորով գրավեց 133-րդ տեղը: Նույնպիսի արդյունքով Վլադիմիր Պողոսյանը 137-րդն էր, Նելլի Աղինյանը գրավեց 145-րդ տեղը: Ամենացածր արդյունքը հայ շախմատիստներից Վահե Բաղդասարյանինն է, որը 3,5 միավորով գրավեց 166-րդ տեղը: