«ԱԶԳ» ՕՐԱԹԵՐԹ

ՀԱՅՏՆԻ ԵՆ «ՍԱՐՈՅԱՆ ՄՐՑԱՆԱԿԻ» ԺՅՈՒՐԻԻ ԱՆԴԱՄՆԵՐԸ

Լոս Անջելեսից «Հայկական դրամատիկական արվեստի դաշնությունն» (ՀԴԱԴ) ու «Վիլյամ Սարոյան հիմնադրամը» տեղեկացնում են, որ արդեն ընտրել են պիեսներ գրելու երրորդ տարեկան մրցանաբաշխության ժյուրիի անդամներին: Դրանք են պրոդյուսեր եւ դերասանուհի Գեյթս Մկֆադդենը, թատերագիր Քեթրին Ֆիլուն եւ թատերագիր-սցենարիստ Էդուարդո Մաչադոն:

Ըստ «Արմինյն միրոր-սփեքթեյթր» շաբաթաթերթի, խորեոգրաֆ եւ դերասանուհի Մկֆադդենը Լոս Անջելեսում գործող Ensemble Studio Theater-ի գեղարվեստական ղեկավարն է: Նախկինում դասավանդել է Պիտցբուրգի եւ Նյու Յորքի ու Հարվարդի համալսարաններում: Դերերով հանդես է եկել «Star Trek», «The Hunt for Red October», «Muppets Take Manhattan» եւ այլ ֆիլմերում:

Ֆիլուն մրցանակակիր թատերագիր է: Հայտնի է մարդու իրավունքների եւ սոցիալական արդարության մասին գրած իր պիեսներով, որոնք ներկայացվել են ինչպես Նյու Յորքում, այնպես էլ աշխարհի տարբեր բեմերում:

Նրա նորագույն «LUZ» պիեսը առաջիկա սեպտեմբեր-հոկտեմբերի ամիսներին բեմադրվելու է Նյու Յորքի «La MaMa» թատրոնում: Արժանացել է բազմաթիվ մրցանակների եւ հիմնադիրներից է «Թատրոնն առանց սահմանների» կազմակերպության:

Ծնունդով կուբացի Մաչադոն ինը տարեկանում է Մ. Նահանգներ գաղթել եւ հասակ է առել Լոս Անջելեսում: Հեղինակ է ավելի քան 40 պիեսների, որոնց թվում կարելի է նշել «The Floating Island Plays» («Ծփացող կղզու պիեսները»), «A Burning Beach» («Այրվող լողափը»), «Havana is Waiting» («Հավանան սպասում է») եւ «The Cook» («Խոհարարը»): Դրանք ներկայացվել են ինչպես Ամերիկայում, այնպես էլ Եվրոպայում: Ներկայումս նա Նյու Յորքի «INTAR» թատրոնի գեղարվեստական ղեկավարն է:

Հարգարժան ժյուրին ընտրելու է եզրափակիչ փուլ հասած երեք պիեսներին, որոնք հրապարակվելու են առաջիկա ամսվա ընթացքում: 10 հազար դոլարի գլխավոր մրցանակակիրը հայտնի է դառնալու ավելի ուշ:

Առավել մանրամասնությունների համար խորհուրդ է տրվում այցելել «www.armeniandrama.org» կայքը:

Հ. Ծ.