Ֆուտբոլի Հայաստանի երիտասարդական հավաքականն անչափ կարեւոր հաղթանակ տոնեց Եվրոպայի 2013-ի առաջնության ընտրական մրցաշարի նախավերջին տուրումՙ 1-0 հաշվով հյուրընկալվելիս պարտության մատնելով Ուելսի ընտրանուն:
Հանդիպումը շատ հաջող սկսվեց մեր հավաքականի համար: Արդեն 7-րդ րոպեին դաշտի տերերի պաշտպան Դեւիդ Սթիվենսը տուգանային հրապարակում կոպիտ խաղաց Գագիկ Պողոսյանի նկատմամբ ու հեռացվեց խաղադաշտից: Իսկ Հովհաննես Համբարձումյանը դիպուկ իրացրեց 11 մ հարվածըՙ բացելով հաշիվը: Հասնելով խաղային եւ թվային առավելության, մեր ֆուտբոլիստները շարունակեցին գրոհները եւ դեռեւս 1-ին խաղակեսին կարող էին կրկնապատկել հաշիվը: Սակայն հաջող խաղաց Ուելսի հավաքականի դարպասապահ Կրիս Մաքսվելըՙ հետ մղելով Մասիս Ոսկանյանի եւ Աղվան Պապիկյանի վտանգավոր հարվածները:
66-րդ րոպեին էլ մեր ֆուտբոլիստները չօգտագործեցին գոլ խփելու հիանալի առիթը: Այս անգամ սեփական տուգանային հրապարակում կանոնները խախտեց դաշտի տերերի դարպասապահը: Կրկին գնդակին մոտեցավ Հովհաննես Համբարձումյանը, սակայն այս անգամ գնդակը դիպավ դարպասաձողին: Դաշտի տերերը կարող էին փրկվել պարտությունից, եթե հաջող չխաղար մեր դարպասապահ Գոռ Էլյազյանըՙ հետ մղելով Լի Լուկասի վտանգավոր հարվածը:
Այս հաղթանակի շնորհիվ Հայաստանի երիտասարդական հավաքականն ամրապնդվեց 2-րդ տեղումՙ էլ ավելի մեծացնելով հաջորդ փուլ դուրս գալու իր հնարավորությունները: Տեսականորեն Հայաստանի հավաքականը կարող է նաեւ խմբի հաղթող ճանաչվել ու հաջորդ փուլի ուղեգիր նվաճել, եթե սեպտեմբերի 7-ին Չեռնոգորիան հաղթի չեխերին, իսկ 3 օր անց մեր ընտրանին հյուրընկալվելիս պարտության մատնի չեռնոգորցիներին:
Ինչպես հայտնի է, բացի խմբերի հաղթողներից, հաջորդ փուլի ուղեգիր են նվաճելու նաեւ խմբերում 2-րդ տեղ գրաված 4 լավագույն հավաքականները: Այս պահի դրությամբ մեր հավաքականը 2-րդ տեղում ընթացող ընտրանիների մեջ 2-րդ արդյունքն ունի թուրքերից հետո, որոնք վաստակել են 15 միավոր եւ արդեն ավարտել են ելույթները: 13-ական միավոր են վաստակել ռուսները, շվեյցարացիներն ու նորվեգացիները, որոնք սակայն մեկ խաղ պակաս են անցկացրել: Այնպես որ սեպտեմբերի 10-ին կայանալիք Չեռնոգորիա-Հայաստան հանդիպումը վճռորոշ կլինի մեր հավաքականի համար:
Մրցաշարային աղյուսակ
| Խ | Հ | Ո | Պ | Գ | Մ | |
| 1. Չեխիա | 6 | 5 | 1 | 0 | 19-3 | 16 |
| 2. Հայաստան | 7 | 4 | 2 | 1 | 11-5 | 14 |
| 3. Ուելս | 7 | 3 | 1 | 3 | 7-5 | 10 |
| 4. Չեռնոգորիա | 6 | 3 | 0 | 3 | 14-8 | 9 |
| 5. Անդորրա | 8 | 0 | 0 | 8 | 2-32 | 0 |