Չեխիայում ընթացող շախմատի Եվրոպայի պատանեկան առաջնությունում գերազանց է հանդես գալիս Հայկ Մարտիրոսյանը, որը 5-րդ անընդմեջ հաղթանակը տոնեց: Հայ շախմատիստը պարտության մատնեց իր հետ աղյուսակը գլխավորող Կոնրադ Դրոզդովսկուն: Այդ հաղթանակից հետո Հայկը 5 միավորով միանձնյա գլխավորեց մինչեւ 12 տարեկանների մրցաշարային աղյուսակը: 4,5-ական միավորով նրան հետապնդում են Կասպեր Գրելան, Վան Նգուենը, Ալեքսեյ Սարանան եւ Ֆարուկ Օզերը: 4 միավոր ունի Արամ Հակոբյանը, որը հաղթեց Ֆահիմ Մոհամադին:
Առաջատարների թվում է մինչեւ 18 տարեկան տղաների մրցաշարում հանդես եկող Հովհաննես Գաբուզյանը: Նա պարտության մատնեց Դմիտրի Դանիլենկոյին եւ 4,5 միավորով զբաղեցրեց 2-րդ տեղը: Գաբուզյանն ընդամենը կես միավոր է զիջում ռուսաստանցի Վադիմ Մոիսեենկոյին: Տարիքային նույն խմբում հանդես եկող Դավիթ Շահինյանն ունի 3,5 միավոր:
Մրցաշարի ամենակրտսեր մասնակիցներից մեկըՙ Շանթ Սարգսյանը մինչեւ 10 տարեկանների մրցաշարում իր 4-րդ հաղթանակը տոնեցՙ առավելության հասնելով Անտոն Տալալովի նկատմամբ: Շանթը 4 միավորով 11-րդ տեղում է: Մրցաշարում եռիշխանություն է: 5-ական միավորով առաջատարներն են Միլոշ Սզպարը, Անդրեյ Եսիպենկոն ու Աբդուլա Գադիմբայլին:
Մինչեւ 14 տարեկանների մրցաշարում հաջող է խաղում Մանուել Պետրոսյանը, որը ոչ-ոքի ավարտելով պարտիան Վլադիմիր Մինկոյի հետ, վաստակեց 4 միավոր: Մանուելն առայժմ անպարտելի է ու մեկ միավորով է հետ մնում աղյուսակը գլխավորող Յան-Կրժիժտոֆ Դուդայից: Տարիքային այս խմբում հանդես եկող Գոռ Ալեքսանյանը վաստակել է 3,5 միավոր, Հրանտ Ալեքսանյանն ունի 3 միավոր:
Մինչեւ 16 տարեկանների մրցաշարում Տիգրան Հարությունյանը վաստակել է 3,5 միավոր, Վլադիմիր Կանջարյանի օգտին գրանցված է 2,5 միավոր: Այստեղ 100 տոկոսանոց արդյունքով առաջատարը Ավիտալ Բուրուչովսկին է:
Աղջիկների մրցաշարում հայ շախմատիստուհիներից բոլորից վստահ է խաղում Մարիա Գեւորգյանը, որը 4-րդ անընդմեջ հաղթանակը տոնեց Աննա Իվանովայի հետ պարտիայում: Մարիան 4,5 միավորով աղյուսակը գլխավորում է Կլաուդիա Վիշնյովսկայայի, Տատյանա Խլիչկովայի եւ Աիսա Իմեեւայի հետ:
Հաղթարշավը շարունակեց նաեւ Անի Հարությունյանը, որը եւս 4-րդ անընդմեջ պարտիան շահեց: Նրա մրցակցուհին Եկատերինա Սմիռնովան էր: Անին 4 միավորով 6-րդ տեղում է: Նա մեկ միավորով է զիջում աղյուսակը գլխավորող Դարիա Վիսանեսկուին: