Ֆուտբոլի Հայաստանի բարձրագույն խմբի առաջնության 20-րդ տուրում միանձնյա առաջատար «Միկան» ավելի ամրապնդեց իր դիրքըՙ 1-0 հաշվով հաղթելով «Փյունիկին»: Վերջինիս համար ճակատագրական եղավ 48-րդ րոպեն, երբ անկյունայինի խաղարկումից հետո «Փյունիկի» պաշտպան Արման Հովհաննիսյանն անսպասելիորեն ձեռքով խաղաց: Նշանակված 11 մ հարվածը հստակ իրացրեց «Միկայի» ավագ Աղվան Մկրտչյանը, որն այդ օրը բարձրագույն խմբում հոբելյանականՙ 250-րդ հանդիպումն էր անցկացնում:
«Միկային» հետապնդող Գյումրիի «Շիրակը», որը 8 անընդմեջ հաղթանակ էր տոնել, չկարողացավ շարունակել հաղթարշավը: Գյումրեցիները 2 կարեւոր միավոր կորցրեցին Կապանում:
«Գանձասարի» հետ խաղում շիրակցիների կազմում վնասվածքների պատճառով բացակայում էր Լամին Լի Յորոն: Չնայած դրան, գյումրեցիներն առաջինը հասան հաջողության: Տուգանայինի խաղարկումից հետո Բորիս Կադիո Դիդիեն գլխի հարվածով գնդակն ուղարկեց դարպասը: Սակայն հաղթական հաշիվը պահպանել չհաջողվեց: Շուտով Դիեգո Լոմբան վերականգնեց հավասարակշռությունըՙ 1-1:
Մեծ հետաքրքրությամբ էր սպասվում 2 հետնապահներիՙ «Բանանցի» ու «Արարատի» խաղը: Սակայն «Արարատին» էլ չհաջողվեց պահպանել հաղթական հաշիվը: Դավիթ Սուջյանը «Բանանցին» փրկեց հերթական պարտությունից:
Երկրի չեմպիոն «Ուլիսին» ոչ մի կերպ չի հաջողվում կարգավորել խաղը: 20-րդ տուրում թիմը հերթական պարտությունը կրեց «Իմպուլսից»ՙ 0-2: Աչքի ընկան Նարեկ Դավթյանն ու Հովհաննես Վերանյանը:
Մրցաշարային աղյուսակ
| Խ | Հ | Ո | Պ | Գ | Մ | |
| 1. Միկա | 20 | 15 | 2 | 3 | 35-19 | 47 |
| 2. Շիրակ | 19 | 13 | 3 | 3 | 33-17 | 42 |
| 3. Իմպուլս | 20 | 11 | 2 | 7 | 34-29 | 35 |
| 4. Գանձասար | 19 | 8 | 5 | 6 | 23-16 | 29 |
| 5. Փյունիկ | 19 | 8 | 3 | 8 | 36-27 | 27 |
| 6. Ուլիս | 20 | 5 | 4 | 11 | 23-30 | 19 |
| 7. Բանանց | 19 | 3 | 5 | 11 | 19-32 | 14 |
| 8. Արարատ | 20 | 2 | 2 | 16 | 12-45 | 8 |
Ռմբարկուները
| Նորայր Գյոզալյան | «Իմպուլս» | 11 |
| Վիուլեն Այվազյան | «Փյունիկ» | 9 |
| Լամին Լի Յորո | «Շիրակ» | 9 |
| Ֆոֆանա Բեկո | «Շիրակ» | 8 |
| Կամո Հովհաննիսյան | «Փյունիկ» | 8 |
| Սեմյոն Մուրադյան | «Միկա» | 8 |