Արդեն 7-րդ տարին է, ինչ Լոռու մարզում անցկացվում է «Թումանյանի հեքիաթի օր» խորագրով տիկնիկային թատրոնների միջազգային փառատոնը, Այս տարի փառատոնը կհյուրընկալի թատրոններ Լիտվայից, Ռուսաստանից, Գերմանիայից, Դանիայից, Իրանից, Վրաստանից, Ֆրանսիայից: UNIMA հայկական կենտրոնի նախագահ Արմեն Սաֆարյանն անդրադառնալով փառատոնին ասաց. «Այս տարի փառատոնին մասնակցելու են նաեւ 3 նորաստեղծ տիկնիկային թատրոններ: Իսկ Չինաստանի Չենդու քաղաքում կայացած UNIMA XXI համաժողովի ժամանակ Հայաստանի պատվիրակությունն առաջարկեց «Տիկնիկները հանուն խաղաղության Միջերկրական ավազանի եւ արաբական աշխարհի երկրներում» ծրագիրը, որն արժանացավ մշակույթի նախարար Հասմիկ Պողոսյանի հավանությանը»:
Փառատոնին ներկա է Տիկնիկային արվեստի գործիչների միջազգային միության նախագահ Դադի Փուդումջին` Հնդկաստանից: «Երեւանը գրքի համաշխարհային մայրաքաղաք 2012»-ի շրջանակում կազմակերպվել է Հովհաննես Թումանյանի եւ մի շարք մանկագիրների գրքերի ցուցադրություն: Ինչպես նախորդ տարիներին, այնպես էլ այս տարի փառատոնի շրջանակում կանցկացվեն վարպետության եւ տիկնիկագործության դասեր, կգործի տիկնիկների ցուցահանդես:
ՄԱՆԱՆԱ ՀՈՎԱԿԻՄՅԱՆ