ՀՀ բարձրագույն որակավորման հանձնաժողովի նախագահ Արտուշ Ղուկասյանը երեկ Մամուլի ազգային ակումբում լրագրողների հետ հանդիպմանը ներկայացրեց, թե ինչպես է տեղի ունենում գիտական որակավորման գործընթացը Հայաստանում:
«2012 թ. հունվարից մինչ այս պահը Հայաստանում գիտության դոկտորի եւ թեկնածուի աստիճանի վկայագրեր են ստացել 386 գիտաշխատող, որոնցից 37-ը արտասահմանցիներ` Գերմանիայից, Իրանից, Ռուսաստանից եւ Եգիպտոսից: Տարեցտարի ավելանում են արտասահմանցիների հոսքը Հայաստան, որոնք գալիս են գիտական աստիճան ստանալու: Իսկ գիտական կոչումներ են ստացել 204 գիտաշխատող, որոնցից 51-ը` պրոֆեսորի, 153-ը` դոցենտի», ասաց Ա. Ղուկասյանը:
Բանախոսը նշեց նաեւ, որ Հայաստանում այժմ գործում է 51 մասնագիտական խորհուրդ, սակայն մինչ այս, խորհուրդների քանակը եղել է ավելի շատ: Խորհուրդների կրճատման պատճառը ժամանակի ընթացքում մասնագիտական խորհուրդների միավորվումն է:
Անդրադառնալով փոփոխություններին, Ա. Ղուկասյանն ասաց, որ 2010 թ. փոխվել է ատենախոսությունների թեմաների հաստատման կարգը, մտցվել են նոր չափանիշներ, ըստ որոնց ատենախոսության թեման հաստատելու համար հիմնարկը պետք է ունենա առնվազն գիտությունների մեկ դոկտոր եւ երկու թեկնածու` տվյալ մասնագիտությամբ:
Մ. Հ.