Կրթության եւ գիտության նախարարությունում երեկ տեղի ունեցած հանդիպման ժամանակ Հայաստանում Ֆրանսիայի դեսպան Անրի Ռենոն նախարար Արմեն Աշոտյանին ներկայացրել է Հայաստանի Ֆրանսիական համալսարանի նորանշանակ ռեկտոր Մոնթուա Ժան Ժակին:
Շնորհավորելով նորանշանակ ռեկտորինՙ նախարարը նրան արդյունավետ աշխատանք է մաղթել եւ հույս հայտնել, որ բացի ավանդական համագործակցությունից` բուհում կլինի նաեւ կրթական ծրագրերի ընդլայնում եւ զարգացում:
Արմեն Աշոտյանը նշել է, որ Ֆրանսիական համալսարանը Հայաստանի լավագույն բուհերից մեկն է. «Բայց մեր պահանջներն ու ակնկալիքները շատ ավելի հավակնոտ են, ինչը ենթադրում է զարգացման նոր հեռանկարներ: Մենք ակնկալում ենք, որ առկա ներուժը նպատակային օգտագործելու դեպքում Ֆրանսիական համալսարանը կարող է դառնալ տարածաշրջանում ֆրանսիական մշակույթի կենտրոն»:
Արմեն Աշոտյանը նաեւ շեշտել է, որ նախարարությունը կարեւորում է, որ Ֆրանսիական համալսարանը գործի որպես անկախ հանրային համալսարան:
Ռեկտորը շնորհակալություն է հայտնել նախարարին եւ նշել, որ պատրաստակամ է նպաստելու Հայաստանում եվրոպական կրթության զարգացմանը:
Ի. Պ.