Հայաստանի արդյունաբերողների եւ գործարարների (գործատուների) միության նախագահ Արսեն Ղազարյանը երեկ միության անունից սիրիահայերի վերաբերյալ հայտարարություն էր տարածել: Հայտարարության մեջ մասնավորապես մտահոգություն է հայտնվում Սիրիայում մեր հայրենակիցների ճակատագրով, որոնք հայտնվել են դժվարին կացության մեջ: Ուստի միության անդամ «գործարարները պատրաստակամություն են հայտնել եղբայրական ձեռք մեկնելու սիրիահայերին, ովքեր Սփյուռքում միշտ էլ զորավիգ են եղել Հայաստանում իրականացվող հայրենաշեն ծրագրերին»: Հայաստանի արդյունաբերողների եւ գործարարների (գործատուների) միության նախագահության նիստը սիրիահայերին աջակցելու վերաբերյալ գործնական որոշում է ընդունել:
- Տրամադրել աշխատատեղ կամ հնարավորության դեպքում ստեղծել նոր աշխատատեղեր սիրիահայերի համար:
- Խորհրդատվությամբ, միության կապերն ու մյուս լծակները օգտագործելովՙ աջակցել սիրիահայ գործարարներին Հայաստանում բիզնես հիմնելու, նրանց գործող բիզնեսը արտերկրից Հայաստան տեղափոխելու գործում:
- Աջակցել միության անդամ ընկերություններում ներդրումներ կատարել ցանկացողներին, նպաստել նրանց ինտեգրմանը Հայաստանի գործարար եւ բարոյահոգեբանական մթնոլորտին:
- Կազմակերպել մասնագիտական սեմինարներ կամ վերաորակավորման ուսուցման դասընթացներ սկսնակ գործարարների համար:
- Գործարարությամբ զբաղվողներին ծանոթացնել Հայաստանի տնտեսական օրենսդրությանը, փոփոխություններինՙ նոր իրավիճակներում արագ եւ ճիշտ կողմնորոշվելու համար:
- Անհրաժեշտության դեպքում հնարավորության սահմաններում աջակցել սիրիահայ ուսանողներին կրթաթոշակների վճարման գործում:
Նշվում է, որ միությունում ստեղծվել է աշխատանքային խումբ, համակարգվում են բոլոր տեղեկությունները եւ առաջարկությունները սիրիահայերի խնդիրները լուծելու համար: Աշխատանքային խումբը համագործակցելու է Հայաստանի սփյուռքի եւ արտաքին գործերի նախարարությունների եւ խնդրին առնչվող պետական ու հասարակական տարբեր կառույցների հետ:
Ա. Մ.