Մինչեւ 16 տարեկանների ֆուտբոլի Հայաստանի պատանեկան հավաքականն անհաջող է հանդես գալիս Աշգաբադում ընթացող Թուրքմենստանի նախագահի գավաթի խաղարկությունում: A խմբում ընդգրկված մեր ընտրանին առաջին խաղում ոչ-ոքիՙ 3-3 հաշվով ավարտեց հանդիպումը Ղրղզստանի հավաքականի հետ: Մեր ֆուտբոլիստներից 2 գոլ խփեց Հովհաննես Փանոսյանը, մեկ անգամ էլ աչքի ընկավ Ռաֆայել Դարբինյանը:
Հաջորդ տուրում հայ պատանիները մրցեցին ղազախների հետ: Մեր հավաքականը 1-2 հաշվով պարտություն կրեց: ՀՀ հավաքականից միակ գոլը խփեց Գառնիկ Հովակիմյանը: Էլ ավելի անհաջող խաղացին մեր ֆուտբոլիստները Թուրքմենստանի պատանեկան հավաքականի հետՙ զիջելով 1-4 հաշվով: Մեր թիմից միակ գոլի հեղինակը Ռաֆայել Դարբինյանն էր:
3 տուրից հետո Հայաստանի պատանեկան հավաքականը 1 միավորով նախավերջինՙ 4-րդ տեղում է եւ արդեն կորցրել է կիսաեզրափակիչ մտնելու բոլոր հնարավորությունները: Աղյուսակը 6-ական միավորով գլխավորում են Թուրքմենստանի եւ Ռուսաստանի հավաքականները, որոնք 2-ական խաղ են անցկացրել: Վերջին խաղում մեր ֆուտբոլիստները կմրցեն ռուսների հետ: