Ֆուտբոլի Հայաստանի ազգային հավաքականն ավարտեց ընտրական մրցաշարի խաղացանկով այս տարվա համար նախատեսված իր մրցախաղերը: Անցկացրած 3 հանդիպումներում մեր ընտրանին ընդամենը 3 միավոր վաստակեց: Ինչ խոսք, հավաքականը սպասված արդյունքը չգրանցեց: Հաշվի առնելով ընտրական նախորդ մրցաշարում ցույց տված բովանդակալից ու կրակոտ խաղը, աշխարհի առաջնության ընտրական մրցաշարի մեկնարկում մեր ֆուտբոլիստներից ավելի բարձր արդյունք էինք ակնկալումՙ նվազագույնը 5 միավոր:
Ինչեւէ, սպասելիքները չարդարացան եւ մնում է սպասել մինչեւ գարուն, երբ հավաքականը սեփական հարկի տակ կհյուրընկալի չեխերին ու մալթացիներին: Այդ խաղերում հարկավոր է առավելագույնը 6 միավոր վաստակել, որպեսզի հնարավոր լինի շարունակել պայքարը եզրափակիչի ուղեգրերի համար:
Ընտրական B խմբում ՀՀ հավաքականն առայժմ 3 միավորով 4-րդ տեղում է: Խմբում կայացած մյուս 2 խաղերում չեխերը սեփական հարկի տակ 3-1 հաշվով պարտության մատնեցին Մալթայի հավաքականին, իսկ Բուլղարիա-Դանիա մրցախաղում գրանցվեց ոչ-ոքիՙ 1-1:
Ընտրական մրցաշարը շատ հաջող է սկսել Ռուսաստանի հավաքականը, որը Ֆաբիո Կապելոյի գլխավորությամբ 3-րդ անընդմեջ հաղթանակը տոնեցՙ 1-0 հաշվով պարտության մատնելով F խմբի առաջատարներից մեկինՙ պորտուգալացիներին: Ռուսները 3 խաղում 7 գոլ են խփելՙ սեփական դարպասը պահելով անառիկ: Իսկ Պորտուգալիայի հավաքականն առաջին պարտությունը կրելով, 6 միավորով 2-րդ տեղում է: Մյուս խաղում Իսրայելի հավաքականը հյուրընկալվելիս 6-0 հաշվով ջախջախեց Լյուքսեմբուրգի ընտրանուն:
Ինչպես միշտ, վստահ են խաղում գերմանացիները, որոնք 9 միավորով C խմբի առաջատարն են: Գերմանիայի ընտրանին պարզապես ջախջախեց իռլանդացիներին մրցակցի դաշտումՙ 6-1: Շվեդները հյուրընկալվելիս Ֆարերներին հաղթեցին 2-1 հաշվով, իսկ Ղազախստան-Ավստրիա խաղում դարպասները մնացին անառիկ:
D խմբում միանգամից 2 հավաքականներ 3-րդ անընդմեջ հաղթանակը տոնեցին: Եթե հոլանդացիների նման վստահ մեկնարկը ոչ մեկին չի զարմացնում, ապա ռումինացիները հաճելի անակնկալ են մատուցում իրենց երկրպագուներին: Նրանք մրցակցի դաշտում 1-0 հաշվով հաղթեցին թուրքերին: Հոլանդացիներից առանձնակի ջանքեր չպահանջվեցին Անդորրայի ընտրանու դարպասը 3 անպատասխան գնդակ խփելու համար: Հունգարիան էլ հյուրընկալվելիս 0-1 հաշվով զիջեց էստոնացիներին:
Առանց միավորի կորստի է ընթանում նաեւ Իսպանիայի հավաքականը, որը ֆրանսիացիների հետ 6 միավորով գլխավորում է I խմբի աղյուսակը: Իսպանացիները Մինսկում վարպետության իսկական դաս տվեցին բելառուսներինՙ 4 անպատասխան գնդակ ուղարկելով վերջիններիս դարպասը: Արդյունավետ խաղով աչքի ընկավ Պեդրոնՙ դառնալով հեթ-տրիկի հեղինակ: Իսպանացիների դարպասապահ Իկեր Կասիլյասը գերազանցեց իրեն պատկանող անխոցելիության ռեկորդը: Նա հավաքականի կազմում վերջին 9 հանդիպումներում գոլ բաց չի թողելՙ ընդհանուր առմամբ դարպասն անառիկ պահելով 728 րոպե շարունակ: Վերջին գոլը նա բաց էր թողել Եվրո-2012-ի մեկնարկային խաղում իտալացի Անտոնիո դի Նատալեից: Կասիլյասի ռեկորդային նախկին ցուցանիշը 708 րոպե էր, որ գրանցվել էր 2008-ին: I խմբի մյուս խաղում ֆինները սեփական հարկի տակ ոչ-ոքի (1-1) ավարտեցին հանդիպումը վրացիների հետ:
A խմբում 7-ական միավորով առաջատարներն են Բելգիայի եւ Խորվաթիայի ընտրանիները: Բելգիացիները մրցակցի դաշտում 3-0 հաշվով հաղթեցին սերբերին, իսկ խորվաթները հյուրընկալվելիս առավելության հասան մակեդոնացիների նկատմամբ (2-1): Նույն խմբի Ուելս-Շոտլանդիա խաղում 2-1 հաշվով հաղթեցին դաշտի տերերը:
E խմբում 7 միավորով աղյուսակը գլխավորող շվեյցարացիները սեփական հարկի տակ ոչ-ոքի (1-1) խաղացին նորվեգացիների հետ: Մյուս խաղերի արդյունքներն ենՙ Սլովենիա-Կիպրոսՙ 2-1, Ալբանիա-Իսլանդիաՙ 1-2:
G խմբում գրանցվել են հետեւյալ արդյունքները. Հունաստան-Բոսնիաՙ 0-0, Սլովակիա-Լատվիաՙ 2-1, Լիխտենշտեյն-Լիտվաՙ 0-2: 7-ական միավորով առաջատարներն են Բոսնիայի, Սլովակիայի եւ Հունաստանի հավաքականները:
H խմբում 5-0 հաշվով հաղթելով Սան Մարինոյի հավաքականին, անգլիացիները 7 միավորով գլխավորեցին աղյուսակը: Մոլդովա-Ուկրաինա խաղում հաշիվը չբացվեց:
Մրցաշարային աղյուսակ
B խումբ
| Խ | Հ | Ո | Պ | Գ | Մ | |
| 1. Իտալիա | 3 | 2 | 1 | 0 | 7-3 | 7 |
| 2. Բուլղարիա | 3 | 1 | 2 | 0 | 4-3 | 5 |
| 3. Չեխիա | 2 | 1 | 1 | 0 | 3-1 | 4 |
| 4. Հայաստան | 3 | 1 | 0 | 2 | 2-4 | 3 |
| 5. Դանիա | 2 | 0 | 2 | 0 | 1-1 | 2 |
| 6. Մալթա | 3 | 0 | 0 | 3 | 1-6 | 0 |