Մայրաքաղաքի «Դինամո» մարզադահլիճում ավարտվեց ԽՍՀՄ վաստակավոր մարզիչ Ռուդոլֆ Կարապետյանի եւ միջազգային կարգի սպորտի վարպետ Եղիշե Կարապետյանի անվան ազատ ոճի ըմբշամարտի միջազգային 4-րդ հուշամրցաշարը: Մրցումներին մասնակցեցին Հայաստանի, Վրաստանի եւ Ռուսաստանի շուրջ 300 պատանի ըմբիշներ:
Երկօրյա համառ գոտեմարտերից հետո հայտնի դարձան քաշային 10 կարգերում հաղթողները: Առավել հաջող հանդես եկան հայ ըմբիշները, որոնք լավագույնը ճանաչվեցին քաշային 6 կարգում: Հաղթողներ դարձան Սիմոն Օրդոյանը (42 կգ), Հայկ Բադալյանը (46 կգ), Վահե Մատինյանը (50 կգ), Հարություն Բարսեղյանը (54 կգ), Սիրեկան Ավդալյանը (58 կգ), Տիգրան Թամրազյանը (63 կգ):
Քաշային 3 կարգում ուժեղագույնը ճանաչվեցին վրացի ըմբիշներըՙ Տարիել Գափրինդաշվիլին (69 կգ), Գեորգի Կետիկաձեն (76 կգ) եւ Տոռնիկե Տուրիան (100 կգ): Ռուսաստանից միայն Ալի-Մագոմեդ Մաչիեւին հաջողվեց կանգնել պատվո պատվանդանի առաջին աստիճանին: