Ամերիկացի մանրէակենսաբանները հետազոտությամբ բացահայտել են օդանավի սրահի ամենակեղտոտ տեղերը: Հետազոտության պատվիրատուների սպասելիքներին հակառակ, դրանք զուգարանները չեն: Զանազան մակերեւույթներից առնված փորձանմուշներում գիտնականները գտել են մոտ 3 հազար մանրէ, հաղորդում է CBS հեռուստաալիքը:
Այդ մանրէների մի մասն ախտահարում է շնչուղիները, կան աղիքային ցուպիկ, կլեբսիելլա (թոքախտ, լորձաթաղանթների ախտահարում) եւ այլն: Այդ մանրէները հայտնաբերվել են մասնավորապես սրահի դռան, բացովի սեղանիկներ վրա:
Սակայն օդանավում ամենակեղտոտ տեղը, ինչպես պարզվեց, բազկաթոռի հետնամասի ներքեւում կարված գրպանն է: Այնտեղ սովորաբար պահում են ոչ միայն հանդեսներ եւ անվտանգության հրահանգներ, այլեւ զանազան իրերՙ մթերքներից մինչեւ օգտագործված թաշկինակներ:
Վնասակար նյութերի մեծ մասը հայտնաբերվել է ոչ միայն սեղանիկի վրա եւ գրպանում, այլեւ ամբողջ բազկաթոռի վրա:
Այսպիսով, ուղեւորը կարող է վարակվել գրիպով, սուր շնչառական հիվանդությամբ, աղիքային վարակով: Դրանից զերծ մնալու համար գիտնականները խորհուրդ են տալիս օգտագործել ձեռքերն ախտահանող միջոցներ, սննդի բաշխման ժամանակ սրբել սեղանիկը եւ ձեռք չտալ բազկաթոռի հետեւի գրպանում թողնված իրերին: