Ֆուտբոլի Հայաստանի բարձրագույն խմբի առաջնության 31-րդ տուրը հաջող էր առաջատարների համար: Գյումրիի «Շիրակը» սեփական հարկի տակ 2-0 հաշվով հաղթեց «Ուլիսին»ՙ տոնելով 4-րդ անընդմեջ հաղթանակը: Շիրակցիներից աչքի ընկան Դավիթ Հակոբյանն ու Մկրտիչ Նալբանդյանը: Այս հաղթանակի շնորհիվ «Շիրակն» ապահովեց 1-ին տեղը եւ մինչեւ գարուն միանձնյա կգլխավորի աղյուսակըՙ անկախ այս տարվա խաղացանկով նախատեսված վերջին տուրի արդյունքից: «Շիրակը» 5 միավորով առաջ է անցել «Միկայից» եւ լավ հնարավորություն ունի իր պատմության մեջ 4-րդ անգամ նվաճելու երկրի չեմպիոնի տիտղոսը: Նշենք, որ վերջին անգամ «Շիրակը» չեմպիոն է հռչակվել 1999-ին:
«Շիրակին» հետապնդող «Միկայի» ֆուտբոլիստներին «Արարատի» նկատմամբ հաղթանակը չափազանց դժվարությամբ տրվեց: «Միկան» միայն վերջին րոպեներին կորզեց հաղթանակը: Եվ կրկին թիմին օգնության եկավ Սեմյոն Մուրադյանը, որը փոխարինման դուրս գալով, խփեց միակ գոլը: Մուրադյանն ընթացիկ առաջնության բոլոր 28 հանդիպումներում էլ փոխարինման է դուրս եկելՙ դառնալով 11 գոլի հեղինակ: Նա յուրօրինակ ռեկորդ սահմանեց: Նախկինում մեկ մրցաշրջանում փոխարինման դուրս գալիս առավելագույն քանակի գոլեր (10) խփել էր փյունիկցի Ալբերտ Թադեւոսյանը: Ընդհանուր առմամբ բարձրագույն խմբում խփած 25 գոլերից 17-ը Սեմյոն Մուրադյանի հաշվին է գրանցվել փոխարինման դուրս գալիս:
Առաջնության լավագույն ռմբարկու Նորայր Գյոզալյանն էլ «Փյունիկի» հետ խաղում իրացնելով 11 մ հարվածը, խփեց 20-րդ գնդակը: Վերջին անգամ ՀՀ առաջնություններում 20 գոլի սահմանագիծը հատել էր Մարկոս Պիզելինՙ 2007-ին 22 գնդակով «Արարատի» կազմում ճանաչվելով առաջնության լավագույն ռմբարկու:
Սակայն Գյոզալյանի գոլն «Իմպուլսին» չփրկեց պարտությունից: «Փյունիկը» հաղթեց 3-2 հաշվով շնորհիվ Կամո Հովհաննիսյանի, Վիուլեն Այվազյանի եւ Դավիթ Մանոյանի խփած գոլերի: «Իմպուլսից» 2-րդ գոլի հեղինակն Արտակ Խաչատրյանն է:
Կապանում հաջող է հանդես գալիս «Գանձասարը», որը 2-0 հաշվով հաղթեց «Բանանցին»: 2 գոլերն էլ իր օգտին գրանցեց Դիեգո Լոմբան:
Եվ այսպես, այս տարի մնաց անցկացնելու միայն մեկ տուր, իսկ առաջնությունը կվերսկսվի մարտի 9-ին: Գարնանը թիմերը եւս 10-ական խաղ կանցկացնեն, որոնք էլ կորոշեն առաջնության մրցանակակիրներին:
Մրցաշարային աղյուսակ
| Խ | Հ | Ո | Պ | Գ | Մ | |
| 1. Շիրակ | 31 | 21 | 5 | 5 | 54-29 | 68 |
| 2. Միկա | 31 | 19 | 6 | 6 | 48-32 | 63 |
| 3. Իմպուլս | 31 | 14 | 6 | 11 | 54-48 | 48 |
| 4. Գանձասար | 31 | 13 | 8 | 10 | 34-27 | 47 |
| 5. Փյունիկ | 31 | 14 | 3 | 14 | 52-44 | 45 |
| 6. Ուլիս | 31 | 8 | 8 | 15 | 33-42 | 32 |
| 7. Բանանց | 31 | 4 | 11 | 16 | 31-48 | 23 |
| 8. Արարատ | 31 | 6 | 3 | 22 | 20-56 | 21 |
Ռմբարկուները
| Նորայր Գյոզալյան | «Իմպուլս» | 20 |
| Ֆոֆանա Բեկո | «Շիրակ» | 13 |
| Անդրանիկ Բարիկյան | «Շիրակ» | 12 |
| Վիուլեն Այվազյան | «Փյունիկ» | 11 |
| Լամին Լի Յորո | «Շիրակ» | 11 |
| Սեմյոն Մուրադյան | «Միկա» | 11 |