«ԱԶԳ» ՕՐԱԹԵՐԹ

ԿԵԱՆՔԸ ՊԻՏԻ ՅԱՂԹԷ

Քայլերս կ’ուղղեմ ուղղակի քաղաքի Սբ Աստուածածին եկեղեցին - առայժմ միակ աշխատունակ եկեղեցին հայ առաքելականներուն:

Ակնարկս կը կեդրոնանայ մուտքի պատին վրայ դրուած հանգուցեալներու նկարներուն: Երէկ հայ մը հոս զոհը եղած է դիպուկահար աւազակի մը անվրէպ փամփուշտին: Անունըՙ Վարդան Խաչատուրեան:

Ես եկեղեցի եկայ գիտնալու համար, թէ 2012-ին մենք այս եկեղեցիին կամարներուն տակ քանի՞ երախայի կնունք ունեցած ենք եւ քանի՞ զոյգ հայեր սուրբ պսակի արժանացած են:

Բայց հայու մը նահատակման տխուր լուրով դիմաւորուեցայ:

Խոնաւ աչքերով մտայ եկեղեցւոյ գրասենեակը եւ իմ ծրագրած հարցումովս ներկայացայ պատասխանատուներուն:

Հարց տուի, թէ քանի՞ հոգի այս տարուան յունուարէն սկսեալ բախտը ունեցած են մկրտուելու այս եկեղեցիի մկրտարանին մէջ:

Եւ ի՞նչ պատասխան ստացայ:

Տետրակ մը բացուեցաւ ու եկեղեցւոյ նուիրեալներէն մէկը համրեց 85 անուն մկրտութիւն 2012 թ.ի յունուարէն մինչեւ նոյեմբերի հինգը:

Ուրախացայ:

Երկրորդ հարցումս. Քանի՞ զոյգ պսակուած են նոյն շրջանին այս եկեղեցւոյ մէջ:

Նոր տետրակ մը բացուեցաւ:

Պատասխանըՙ 77 հայ զոյգ արժանացած են պսակի յունուարէն մինչեւ հոկտեմբերի աւարտը:

Այո՛, սովորութիւն է արձանագրել հայ նահատակներու մասին իրենց լուսանկարներով: Այդ բոլորը կը կարդանք եկեղեցին շրջապատող դուրսի պատին վրայ:

Ուրկէ՞ պիտի իմանայինք թիւը նորածնունդներուն եւ սուրբ պսակի արժանացողներուն:

Ահա թէ ինչո՛ւ, հայրենակիցներ, ջուրը աղբիւրէն խմելու համար գացի եկեղեցի եւ ձեզի ներկայացուցի վերի թիւերըՙ 42 նահատակի դիմաց 85 նորածին հայորդիներու կնունք եւ 77 զոյգերու պսակ:

Նահատակները կը տխրեցնեն մեզ լալու աստիճան:

Բայց մենք ուրախանալու չե՞նք, երբ կը տեսնենք, թէ բազում նորածիններ ունինք եւ բազում հայկական նոր ընտանիք կազմողներ...

Հայ կեանքը կը շարունակուի Հալէպ՛ մէջ:

ՄԱՆՈՒԷԼ ՔԵՇԻՇԵԱՆ, Հալէպ, 5 նոյ. 2012