«Yes, we have» ԳՐՔԻ ԼՐԱՄՇԱԿՎԱԾ ՏԱՐԲԵՐԱԿԸ Հ. Ծ. «Հինգ տարիների ուսումնասիրություններից հետո անգամ ես դեռ զարմացած եմ Ամերիկայում հայկական ձեռքբերումների եւ նվաճումների հսկայական չափեով եւ բազմազանությամբ: Դա պարզապես ապշեցուցիչ է», ասել է Ստեփան Փարթամյանն իր նոր գրքի հրատարակման առիթով: Նոր հատորը, ըստ «Արմինյըն միրոր սփեքթեյթըր» շաբաթաթերթի նոյեմբերի 30-ի հաղորդագրության, 2010-ին հրատարակված «Yes, we have» (Այո, մենք կատարել ենք) 140 էջանոց, մոտ 130 կարճ կենսագրականներ պարունակող գրքի ընդլայնված, լրացված տարբերակն է, որտեղ 800-ից ավելի էջերի վրա 700-ից ավելի կենսագականներ են ընդգրկված: Լոս Անջելեսում «Հայկական արվեստների հիմնադրամի» կողմից հրատարակված այս հատորը շարքի հինգերորդն է, որտեղ նախկինում տպագրված տեղեկությունները լրամշակման են ենթարկվել նոր ուսումնասիրությունների արդյունքում հայտնաբերված փաստերի հիման վրա: Ինչպես նախկին հրատարակությունների, այնպես էլ այս նոր հատորի վաճառքից գոյացած ամբողջ գումարը հատկացվելու է «Հայկական աշխարհ» հրատարակչական ծրագրի իրականացմանը»: Փարթամյանը, որ ծնվել է Բեյրութում, եւ հետագայում ԱՄՆ տեղափոխվել, Նորթրիջի (Կալիֆոռնիա) պետական համալսարանի հեռուստատեսության եւ ֆիլմարվեստի բաժնի շրջանավարտ է եւ հայկական մշակույթի թերեւս ամենաակտիվ քարոզիչը: Նա կոչ է արել աջակցել իր ծրագրինՙ գնելով իր նոր լույս ընծայած հատորը (գինըՙ 40 դոլար) կամ ֆինանսական նվիրատվություն կատարելով www.letuseducate.com կայք այցելելով: | 
