Մարտի 17-ին Եվրասիական տնտեսական հանձնաժողովի կոլեգիայի նիստում քննարկվել է անոթային ստենտերի համար ԵՏՄ ներմուծման միասնական մաքսատուրքի ժամանակավոր նվազեցման հարցը եւ սահմանվել, որ անոթային ստենտերի ներմուծման միասնական մաքսատուրքը 5 %-ից նվազեցվում է 0-% եւ այս դրույքաչափը կգործի մինչեւ 2017 թվականի ապրիլի 19-ը: Ինչպես նշել է Եվրասիական տնտեսական հանձնաժողովի անդամ (նախարար) Կարինե Մինասյանը` «Այս որոշման ընդունման հիմնական նպատակը ԵՏՄ անդամ գրեթե բոլոր երկրներում բավականին թանկարժեք բժշկական ծառայությունների արժեքի նվազեցումն է: Մյուս կողմից 2 տարվա ընթացքում հնարավոր է մեր երկրներ ներգրավել համաշխարհային ճանաչում ունեցող անոթային ստենտ արտադրողներին, որոնց համար կարծում եմ մեծ հետաքրքրություն կարող է ունենալ այս ապրանքի ԵՏՄ շուրջ 200 մլն դոլար շրջանառության ծավալով աճող շուկան»:
