ԳՅՈՒԼԲԵՆԿՅԱՆ ՀԻՄՆԱՐԿՈՒԹՅԱՆ ՆՈՐ ԾՐԱԳԻՐԸ ԼԻԲԱՆԱՆԱՀԱՅ ԴՊՐՈՑՆԵՐԻ ՀԱՄԱՐ Գալուստ Գյուլբենկյան հիմնարկությունը լիբանանահայության կրթական համակարգին օգնության ձեռք մեկնելու իր քաղաքականությանը նոր դրսեւորումներ է հաղորդել, ինչպես տեղեկանում ենք «Ազգ»ին ուղարկված հաղորդագրության մեջ: Երեք նոր ծրագրեր են մշակվել այդ ուղղությամբ, որոնցից առաջինն ու գլխավորը հայկական դպրոցներին նպաստ հատկացնելու ծրագիրն էՙ ի հավելումն վերջերս լիբանանահայ դպրոցների ուսուցիչներին շուրջ 170 հազար դոլար հատկացնելու քայլի, որի մասին գրել էինք նախապես: Այս նոր ծրագրով այդ դպրոցներին խրախուսվում է բարեփոխելու իրենց մանկավարժական համակարգը, շեշտը դնելով արեւմտահայերենի որակյալ ուսուցման վրա: Երկրորդ ծրագրում ընդգրկված է լինելու տարբեր առարկաներ դասավանդող ուսուցիչների որակի բարձրացումըՙ շարունակական վերապատրաստման միջոցով, դարձյալ արեւմտահայերենի կիրառմամբ: Երրորդը «Հայերենի օժանդակ դասընթացի ծրագիրն» է, որի նպատակն է մասնակիցների արեւմտահայերեն լեզվամտածողության, նրանց լեզվական, մշակութային, վերլուծական եւ քննական լեզվամտածողական հմտության զարգացումը: | 
