ԺԱՄԱՆԱԿԱԿԻՑ ԱՐՎԵՍՏԻ ՓԱՌԱՏՈՆ «Չորս կարիճ» հասարակական կազմակերպությունը պատրաստվում է 2014-15 թվականներին Երեւանում իրականացնել «Infinity Art Festivalե ժամանակակից արվեստի փառատոն: Փառատոնի բոլոր միջոցառումները կանցկացվեն հասարակական կազմակերպության «Աշխարհն ինչպիսին է եւ ինչպիսին պետք է լինի» նշանաբանի ներքո: «Չունենալով պետականություն` երկար տարիներ մենք չենք կարողացել մեր խոսքն ասել աշխարհին, իսկ այն մանր նախագծերը, որոնք այսօր իրականացվում են Հայաստանում, ցածր մակարդակի վրա են: Մշակույթի շնորհիվ մենք կարող ենք մեր երկիրը դարձնել այլ պետությունների մրցակիցը: Պատրաստվում ենք մեր նախաձեռնությանը ներգրավել տարբեր երկրներ ներկայացնող արվեստի հայտնի գործիչների: Բնականաբար շատ ռեսուրսներ են պետք նախագիծն իրականացնելու համար»,- «Արմենպրես»-ի թղթակցի հետ զրույցի ժամանակ նշել է «Չորս կարիճ» կազմակերպության ղեկավար Հայկ Մութաֆյանը: Նախաձեռնության հեղինակը նշում է, որ փառատոնը կազմակերպելու համար լուրջ ֆինանսական աղբյուրներ են անհրաժեշտ: Կազմակերպությունը կհամագործակցի նաեւ ՀՀ մշակույթի նախարարության հետ, բայց ավելի շատ ցանկություն ունի նախաձեռնությանը ներգրավել ոչ պետական կառույցների ներկայացուցիչներին: «Փառատոնին ընդառաջ օգոստոս-սեպտեմբերից սկսում ենք պրոմո-ակցիաներ իրականացնել` երաժշտական միջոցառումների, ցուցահանդեսների տեսքով, որպեսզի դրանց շնորհիվ ներգրավենք աջակիցների»,- նշեց Հայկ Մութաֆյանը: «Չորս կարիճ» հասարակական կազմակերպության նախագահը նշել է, որ իրենք պատրաստվում են ստեղծել հատուկ հանձնաժողով, որում ներգրավված կլինեն մշակույթի գործիչներ: Հանձնաժողովն ամեն ամիս կներկայանա մամուլի ասուլիսներով եւ կքննարկի սոցյալ-մշակութային հարցեր: Մշակույթին կանդրադառնան նաեւ հատուկ ստեղծված հեռուստահաղորդումների միջոցով: «Չորս կարիճ» հասարակական կազմակերպությունը ստեղծվել է 2008 թվականին եւ զբաղվում է տարածաշրջանի ժամանակակից արվեստի զարգացմամբ: | 
