ԽԱՄԵՆԵԻՆ ԽՈՍԵՑ «ՄԻՋՈՒԿԱՅԻՆ» ԲԱՆԱԿՑՈՒԹՅՈՒՆՆԵՐԻ ԵՎ ԻՍՐԱՅԵԼԻ «ԴԱՏԱՊԱՐՏՎԱԾՈՒԹՅԱՆ» ՄԱՍԻՆ Իրանի գերագույն հոգեւոր առաջնորդ, այաթոլլահ Ալի Խամենեին երկրի «Բասիջ» աշխարհազորի առջեւ ելույթ ունենալովՙ հայտարարել է, որ Իրանը չի հրաժարվի ատոմային մշակումներից: Նա նաեւ դատապարտել է «Վեցյակ»-Իրան բանակցություններում Ֆրանսիայի կոշտ դիրքորոշումը եւ հայտարարել է, որ Իսրայելի պետությունը «դատապարտված է անհետացման»: «Իսրայելի վարչակարգը հենվում է խախուտ հիմքի վրա, իսկ որեւէ արհեստական երեւույթ չի կարող դիմանալ ժամանակի փորձությանը», հայտարարել է Խամենեին: Նա ընդգծել է, որ Իրանը չի ընկրկի արտաքին ճնշումների եւ պատժամիջոցների դեմ հանդիման: Խամենեին ավելացրել է, որ Իրանը քեն չի պահում ամերիկյան ժողովրդի նկատմամբ եւ ձգտում է բարեկամական հարաբերություններ հաստատել ԱՄՆ-ի հետ: Իսրայելական newsru.co.il կայքէջը գրում է, որ իրանցի աշխարհազորայինները նրա այդ հայտարարությունն ընդունել են «Մա՛հ ամերիկացիներին» բղավոցներով: Քաղաքական մեկնաբաններից շատերը կարծում են, որ իրանցիների միջուկային ծրագրի շուրջը «Վեցյակի» երկրների եւ Իրանի վերսկսած բանակցություններում հնարավոր է համաձայնագրի ստորագրումՙ չնայած Իսրայելի կառավարության նախաձեռնած հակաիրանական դիվանագիտական արշավին: | 
