ԱԶՆԱՒՈՒՐ ԱՆԳԱՄ ՄԸ ԵՒՍ ՆՈՒԱՃԵՑ ԼԻԲԱՆԱՆԵԱՆ ԲԵՄԱՀԱՐԹԱԿԸ... Պայծիկ ԳԱԼԱՅՃԵԱՆ Կարելի է անվարան յայտարարել, թէ հակառակ զինք շրջապատող ահազանգային քաղաքականութեան, Լիբանանի մշակութային կեանքը յաջողապէս ինքզինք գերազանցեց այս եղանակին: Ամիսներ առաջ արդէն իսկ տոմսերու վաճառքը սպառած նկատուած համերգը յիրաւի արդարացուց ինքզինք, ապահովելով վեց հազար հանդիսատես, որոնք ժամանած էին Լիբանանի զանազան շրջաններէն: Աշխարհահռչակ երգիչը, երգահանը, բանաստեղծն ու դերասանը, հակառակ իր տարիքին, այնքան շքեղօրէն պանծացուց Պաթրունի Միջազգային ֆեստիվալի համերգը, որ իր երգի սիրահարները ելեկտրականացած կառչած կը մնային ստեղծուած արուեստային մթնոլորտին մէջ: Զուր տեղ չէ, որ ֆրանսական «շանսոն»ը բոլոր ժամանակներու ընթացքին մնաց անգերազանցելի, շնորհիւ Շարլ Ազնաւուրի: Ան համաշխարհային առաջնակարգ համերգասրահներու մէջ ելոյթ ունենալով հպարտօրէն արտայայտուած է իր հայկական ծագման մասին: Երախտագիտութեան ազնիւ զգացումներով ան բարձրաձայնած է իր հայու ինքնութեան ու իր հայկական արմատներունՙ ինչպէս, ախալցխացի հօր ու իզմիրցի մօր տուած դաստիարակութեան մասին: Մտաւորականութիւնը յաճախ արտայայտուած է, որ «եթէ սիրոյ լեզուն ֆրանսերէնն է, ապա աղօթքի լեզուն անպայման հայերէնն է»: Իսկ համաշխարհային ճանաչում ունեցող արուեստագէտներ յաճախ արտայայտուած են, թէ «շանսոն»ի մայրենի լեզուն ֆրանսերէնն է, ապա մեր պարագայինՙ շանսոնի արքան ՀԱՅ է: Ազնաւուրի մեկնաբանութիւններու շտեմարանը հարուստ է իր ստեղծագործած 1000-է աւելի երգերով, որոնց ընդմէջէն գլուխգործոցներ կարելի է համարել «Լա Պոեմ»ը, «Աւէ Մարիա»ն, «Մամա»ն, «Իզապէլ»ն ու «Երկու կիթար» երգերը, որոնք մեծ յափշտակութեամբ ունկնդրուեցան Պաթրունի փառատօնի ընթացքին: Երեկոյթի մթնոլորտէն ներշնչուած ու զգացուած, զիս այնքան աւելի կը յուզէին, երբ վկան կ՛ըլլայի շուրջ բոլորս գտնուող լիբանանցի (արաբ) ունկնդիրներուն, որոնք խոր ապրումներով կ՛ընկերակցէին ՄԵՐ «շանսոնիէ»ինՙ յատկապէս «Այս է վերջը», «Դեռ երէկ» եւ «Ճահելութիւն» երգերու ընթացքին: Արդարեւ, անցնող շաբաթավերջին լիբանանահայ հանդիսատեսը, որ անհամբերութեամբ կ՛ակնկալէր, որ Հայոց ցեղասպանութեան 100-րդ տարելիցին առիթով մեր ժողովուրդի մեծագոյն «շանսոնիէ»ն գէթ մեկնաբանէր «Անոնք ինկան», կամ հպանցիկ ակնարկ մը կատարէր ցեղասպանութեան նկատմամբ, սակայն յուսախաբ եղաւ, եւ բաւարարուեցաւ սրահէն բաժնուիլ իր ազգին հպարտութիւնն ու հայու տաղանդին խորհրդանիշը հանդիսացող 91ամեայ երգիչին լիբանանեան բեմահարթակին վրայ ունեցած մեծագոյն յաջողութեամբ: Պէյրութ |
