ԹԱՆԳՅԱՆԻ ՆՈՐ ՍԻՄՖՈՆԻԿ ՍՏԵՂԾԱԳՈՐԾՈՒԹՅՈՒՆԸ Հ. Ծ. «Իմ խորին համոզմամբ արվեստագետը պարտավոր է փորձել տարբեր ժանրեր, հետեւել իր տեսլականին, այլապես նա կլճանա անընդհատ կրկնելով իրեն», նշել է «L.A. Weekly» լոսանջելեսյան շաբաթաթերթի բնութագրմամբ «nu-metal» ժանրի լավագույն խմբերից մեկիՙ «System of a Down-ի» մեներգիչ Սերժ Թանգյանը այդ պարբերականին տված հարցազրույցի ժամանակ: Պարբերականը երգչին անդրադարձել է «Valley» կատարողական արվեստի կենտրոնում նոյեմբերի 10-ին եւ 12-ին նրա ներկայացրած «Orca Symphony N1» սիմֆոնիկ ստեղագործության առթիվ: Ստեղծագործության, որը հնչել է CSUN սիմֆոնիկ նվագախմբի կատարմամբ, առաջին մասը, ըստ Թանգյանի, մարդկային եսասիրության գործած ավերածությունների ամփոփ քննարկում է: «Մենք նվաճել ենք, խորտակել, կուռքեր կառուցել մեզ համար», բացատրել է երգիչը: Իսկ երկրորդ մասըՙ որը կոչվում է «Օվկիանոսյան խուսափանք», մղում է ավելի խորհրդածությունների: Ո՞վ ենք մենք, ո՞ւր ենք գնում, ի՞նչ է նշանակում այս ամբողջ նյութապաշտությունը, եւ այլն: Սրանք հարցեր են, որ երգիչը փորձել է պատասխանել վերջին տասնամյակի ընթացքում, 2006-ին «Elect the Dead» ալբոմը թողարկելուց հետո: «Նա ինչպես միշտ խորապես մտահոգված է աշխարհի ճակատագրով, սոցիալական արդարության խնդիրներով», գրում է երգչի մասին պարբերականը: «Սա իմ կարիերայի հաջորդ փուլն է», հայտարարել է Թանգյանը: |
