ԱԲՐԱՀԱՄԸ ՀՈՒՍՈՎ Է, ՈՐ ՌԵՎԱՆՇ-ՄԵՆԱՄԱՐՏԸ ԿԿԱՅԱՆԱ Ինչպես տեղեկացանք Արթուր Աբրահամի մամուլի ծառայությունից, Ռոբերտ Շտիգլիցի հետ մենամարտում աչքի վնասվածք ստացած հայ բռնցքամարտիկի առողջական վիճակը նորմալ է: Արթուրը տեսողության հետ կապված որեւէ խնդիր չունի: Մենամարտից հետո նա բուժզննում էր անցել հիվանդանոցում եւ որեւէ լուրջ վնասվածք չէր հայտնաբերվել: Պարզապես ակնախոռոչն ուռել էր եւ փակել էր ակնաբիբը: Ներկայումս Արթուրը նույնիսկ արեւային ակնոց չի կրում: Ինչպես հայտնի է, մենամարտից հետո Արթուրը ռեւանշ-մենամարտ էր պահանջել Շտիգլիցից, որը մրցակիցն ընդունել էր: Այս առնչությամբ Արթուրը հետեւյալն է ասել. «Մենամարտին լավ էի պատրաստվել: Բայց բռնցքամարտում անկանխատեսելի երեւույթներ հաճախ են պատահում: Շտիգլիցի հարվածից հետո նրա ձեռնոցի բութ մատը մտավ աչքս, որի պատճառով էլ ակնախոռոչս ուռեց եւ բժիշկը չթույլատրեց շարունակել մենամարտը: Իմ եւ Շտիգլիցի 3-րդ մենամարտը որոշիչ կլինի: Հուսով եմ, որ Շտիգլիցն ինձ ռեւանշի հասնելու հնարավորություն կտա, չէ՞ որ մեր անձնական հանդիպումների հաշիվն առայժմ հավասար էՙ 1-1: Դեռ հայտնի չէ, թե երբ կկայանա ռեւանշ-մենամարտը, որի կազմակերպման հարցում պետք է 2 կողմերը բանակցեն ու համաձայնության գան»: |
