ԼՅՈՒԲԱ ՈՒՍՊԵՆՍԿԱՅԱՆ, ՍՈՆԱՆ ԵՎ ՈՒՐԻՇՆԵՐՙ ԱՇԽԱՐՀԱՀՌՉԱԿ ՀԱՅ ՋՈՒԹԱԿԱՀԱՐ ԷԴԳԱՐ ՀԱԿՈԲՅԱՆԻ ՄԵՆԱՀԱՄԵՐԳԻՆ Ճանաչված ջութակահար Էդգար Հակոբյանը Մոսկվայում «Мир» համերգասրահում մենահամերգի ժամանակ ջութակային «հեղափոխություն» է կատարել: Հետաքրքրական է, որ Էդգարը համերգը սկսել է իր հարազատ Երեւան քաղաքի ծնունդը շնորհավորելով: Նույնիսկ մեծ հեռավորության պայմաններում Հայաստանի մայրաքաղաքն ու նրա բնակիչները ջութակահարի սրտում են: Էդգարի վարպետության շնորհիվ ջութակիՙ որպես բացառապես դասական երաժշտական գործիքի մասին պատկերացումը շատերի մոտ փոխվել է: Ներկաները հնարավորություն են ունեցել ունկնդրել երաժշտություն, որը ջութակահարը կոչում է «միավորող»: Աշնանային այդ գեղեցիկ երեկոյի ընթացքում այն իսկապես շատերին է միավորել: Հանդիսատեսը երկար կհիշի ջութակի միջոցով ստեղծված հրաշքը, Manuk Gazaryan Band-ի եւ Պրոկոֆեւի անվան ռուսական սիմֆոնիկ նվագախմբի փայլուն ելույթները: Էդգարին աջակցելու էին եկել նաեւ նրա ընկերներըՙ Տիգրան Պետրոսյանը, Լյուբա Ուսպենսկայան եւ Sona-ն: Կադրից դուրս է մնացել միայն Ռոբերտ Բոյմըՙ տաղանդավոր հնչյունային ռեժիսոր, ով դահլիճում հրաշալի հնչողություն է ապահովել: «Շնորհակալ եմ համերգի բոլոր մասնակիցներին, ամենից առաջՙ ինձ հետ բեմում հանդես եկած երաժիշտներին: Նրանք պրոֆեսիոնալներ են եւ նրանց հետ հաճելի է ելույթ ունենալ»,- պատմել է Էդգար Հակոբյանը: «Իմ բազմաթիվ ընկերները, ովքեր համերգի համար ժամանել էին արտերկրից, խոստովանեցին, որ միջոցառումն անցավ համաշխարհային մակարդակով: Ինձ շատ ուրախացրեց մեծ թվով հանդիսատեսի ներկայությունը: Դա խոսում է այն մասին, որ մեզ իսկապես հաջողվեց փոքրիկ երաժշտական հեղափոխություն կատարել: Դահլիճում հրաշալի մթնոլորտ էր: Հաճելիորեն զարմացրեց նաեւ այն, որ իմ Facebook-ի էջում, փաստորեն, իմ համերգի հանպատրաստից առցանց-հեռարձակում սկսվեց: Ուրախ եմ, որ այդ հրաշալի օրը բեմում էի. իմ հարազատ Երեւան քաղաքի եւ եղբորս ծննդյան օրն էր»,- պատմել է երաժիշտը: | 
