ՆԱՊՈԼԵՈՆԻ ԿՏԱԿԻ ՄԻԱԿ ՊԱՏՃԵՆԸ ՎԱՃԱՌՎԵՑ ԱՃՈՒՐԴՈՒՄ Պ. Ք. Ֆրանսիայում աճուրդի է հանվել Նապոլեոն Բոնապարտ կայսեր կտակի միակ պատճենը, հաղորդում է Fox News հեռուստաալիքը: Նշվում է, որ փաստաթուղթը վաճառվել է 357 հազար եվրոյով: Դա մոտավորապես կրկնակի գերազանցում է այն գումարը, որ ակնկալում էր ստանալ Druout աճուրդային կենտրոնը: Գնորդը պարզաբանել է, որ ինքը ցուցադրության չի դնելու կտակի պատճենը, քանի որ այն ձեռք է բերել անձնական հավաքածուի համար: Գնորդը չի հրապարակել իր անունը: Հայտնի է միայն, որ նա ֆրանսիացի տղամարդ է: Նապոլեոնի ձեռքով գրված կտակի բնօրինակը պահվում է Փարիզումՙ Ֆրանսիայի ազգային արխիվում: Կտակը պատճենահանել է նոտարիուսը: 1821 թ. ապրիլի 16-ով թվագրված փաստաթղթում Նապոլեոնը խնդրում էր իրեն թաղել Սենի ափին: Նա սեփական կարողության կեսը կտակում էր իր արշավանքներին մասնակցած ֆրանսիական բանակի սպաներին: Նապոլեոնը մահացել է 1821 թ. մայիսի 5-ին Սուրբ Հեղինե կղզում, ուր նրան իբրեւ ռազմագերու աքսորել էին անգլիացիները 1815 թ. Վառլոյի ճակատամարտում ֆրանսիացիների կրած պարտությունից հետո: Նապոլեոնի մահից հետո նրա աճյունը տեղափոխվել է Ֆրանսիա: Նա թաղված է Սենի ափին գտնվող Հաշմանդամների տանը: | 
