ՕԴԱՆԱՎԱԿԱՅԱՆԻ ՄԱՍՏԵՐ ՊԼԱՆԸ ՀԱՍՏԱՏՎԵՑ Ա. Մ. Վարչապետն առաջարկում է կոնցեսիոներինՙ հին շենքի պահպանման ձեւեր գտնել «Զվարթնոց» օդանավակայանի կոնցեսիոների ներկայացրած 2013-2017թթ. մաստեր պլանը` ի կատարումն ՀՀ կառավարության ու «Կորպորասիոն Ամերիկա Ս. Ա.» ընկերության միջեւ 2001թ. դեկտեմբերի 18-ին ստորագրված պայմանագրի պահանջների, երեկ հաստատվեց կառավարությունում: «Ենթադրվում է, որ կոնցեսիոները 102 մլն դոլարի ներդրում կկատարի օդանավակայանում, որը լավագույնն է ճանաչվել ԱՊՀ-ում: Այդ ներդրումը հնարավորություն կտա մի կողմից բարձրացնել մատուցվող ծառայությունների որակը, մյուս կողմից` զարգացնել զբոսաշրջությունը. սա մեզ համար գերակա խնդիր է», ասաց վարչապետ Տիգրան Սարգսյանը : Նա նաեւ անդրադարձավ օդանավակայանի հին շենքի հետագա ճակատագրին: «Հասկանալի է, որ կլոր մասնաշենքը ֆիզիկապես քայքայված վիճակում է: Փորձագետների գնահատականների համաձայն` պահանջվում է 15-20 մլն դոլարի ներդրում: Դա չափազանց ծախսատար գործառույթ է, դրա համար առաջարկվում են ճարտարապետական այլ լուծումներ: Սովետական մոդեռնիզմի մասնաշենք է, բնականաբար մեր ճարտարապետները այդ առումով ներկայացնում են լրացուցիչ քննարկման անհրաժեշտության խնդիրը, եւ մենք պետք է նույնպես դիմենք կոնցեսիոներին, որպեսզի այդ լրացուցիչ քննարկումները տեղի ունենան եւ գտնվեն այնպիսի լուծումներ, որ պատմամշակութային, ճարտարապետական արժեք ներկայացնող հուշարձանները մենք կարողանանք ինչ-որ ձեւով պահպանել», կարծիք հայտնեց վարչապետը: |
