ԵՐԵՎԱՆԻ ՏՐԱՆՍՊՈՐՏԻ ՍԱԿԱԳԻՆԸ ՉԻ ԹԱՆԿԱՆԱ ՀՈՒՆՎԱՐԻ 1-ԻՑ Ա. Մ. Երեւանի քաղաքային տրանսպորտի գինը հունվարի 1-ից չի բարձրանա: Այդ մասին երեկ հայտնեց Երեւանի քաղաքապետի տեղակալ Վահե Նիկոյանը: Նա նշեց, որ այժմ իրականացվում է երթուղիների հետազոտություն, եւ մինչեւ չունենանք Երեւան քաղաքի ուղեւորահոսքի մանրակրկիտ ուսումնասիրության արդյունքները, չի կարող լինել տրանսպորտի սակագնի հարց: Տրանսպորտի սակագինը որոշելու ժամանակ հաշվի է առնվելու ուղեւորահոսքի ցուցանիշը: Ուսումնասիրությունը, որին մասնակցում են նաեւ միջազգային մասնագետներ, թույլ կտա տեղեկություններ ունենալ մեկ օրվա ընթացքում մայրաքաղաքի ուղեւորահոսքի, երթուղայինների կանգառների, ուղեգծի աշխատանքային օրվա մեկնարկի եւ ավարտի, չվացուցակի պահպանման մասին եւ այլն: «Հետազոտության արդյունքները պատրաստ կլինեն հունվարի վերջին», նշեց Վահե Նիկոյանը: |
