ՎԱԽՃԱՆՎԵՑ ՀՈՒՇԱՐՁԱՆԱԳԵՏ ՍԱՄՎԵԼ ԿԱՐԱՊԵՏՅԱՆԸ Փետրվարի 27-ին մահկանացուն է կնքել անվանի հուշարձանագետ, Հայկական ճարտարապետությունն ուսումնասիրող հիմնադրամի (ՀՃՈւՀ) երեւանյան գրասենյակի նախագահ Սամվել Կարապետյանը: Ս. Կարապետյանը ծնվել է 1961 թվականի հուլիսի 30-ին: Արմատներով Արճեշ գավառի Բերդաղ գյուղից է: 1978 թվականին ավարտել է Երեւանի Միսաք Մանուշյանի անվան թիվ 48 դպրոցը: 1975 թվականից ճամփորդել է Հայկական ԽՍՀ տարածքովՙ բնությունը ուսումնասիրելու նպատակով, իսկ 1978 թվականից սկսած լուսանկարում, չափագրում եւ նկարագրում էր հայկական հուշարձանները ամբողջ Պատմական Հայաստանի տարածքով: Երեք տասնամյակի ընթացքում հետազոտում եւ ցուցակագրել է Պատմական Հայաստանի հայ ճարտարապետության հազարավոր նմուշներ: Կարապետյանը հայտնի էր որպես հարեւան պետություններում հայկական հուշարձանների նկատմամբ վատ վերաբերմունքի քննադատ: Նա կարծում էր, որ Թուրքիայի, Ադրբեջանի, Վրաստանի իշխանությունները նպատակաուղղված կերպով իրականացնում են հայկական հուշարձանների ոչնչացման քաղաքականություն: Իր փաստերը 2007 թ. ներկայացրել է ԱՄՆ կոնգրեսին եւ 2008 թ. Մարդու իրավունքների Եվրոպական դատարանին: Իր գիտական գործունեության ընթացքում հեղինակել է տասնյակ հատորներ ու հոդվածներ: Ծրագրում էր առաջիկա տարիներին ավարտին հասցնել Հայաստանի պատմության 36 հատորյակը: Սամվել Կարապետյանը կյանքից հեռանալովՙ անավարտ թողած բազմաթիվ աշխատություններ, որոնք պետք է լույս տեսնեին: Հայ մշակույթի նվիրյալի մասին առավել մանրամասնՙ թերթի հաջորդ համարում: | 
