ՍՐԲՈՒՀԻ ԱԲԱՋՅԱՆԻ ՑՈՒՑԱՀԱՆԴԵՍԸ ՏՈԿԻՈՅՈՒՄ Հ. Ծ. Գլենդեյլից «News Press» պարբերականի հաղորդմամբ, Ճապոնիայում հայկական դեսպանատան հրավերով նկարչուհի-քանդակագործ Սրբուհի Աբաջյանը հունիսի սկզբներին իր գծանկարներն ու քանդակներն է ցուցադրել Տոկիոյում «Հայկական մշակույթի օրերի» շրջանակներում: Ցուցահանդեսում տեղ են գտել նրա «Որմնանկարներ երկնքի վրա» եւ «Բոլոր ճանապարհները դեպի մարդկանց են առաջնորդում» շարքերից որոշակի նմուշներ: Ժամանակին Լա Կրասենտայի «Դոքմեջյան այգում» ցուցադրված առաջինի շարքում ընդգրկված են եղել 3 մետրx1,5 մետր չափսերով մարդկանց քանդակներ, որոնք իրենց դեմքերի, աչքերի արտահայտությամբ եւ ձեռքերի ժեստերով իրենց իրավունքներն են պահանջում: Երկրորդի շարքումՙ ցուցադրված «Բրենդ գրադարանի եւ արվեստի կենտրոնում» հաղորդակցվելու կարոտ ներգաղթյալների առօրյան պատկերող կտավներ, գծանկարներ: «Սիրում եմ գծանկարներով արտահայտել իմ զգացմունքները: Այդ գծերը ավելի պարզ են ու անմիջական, բայց լի են հուզականությամբ: Կարեւոր չէ, թե որտեղ ենք մենք ապրում: Որպես մարդկային էակներ մենք կարիք ունենք հաղորդակցվելու միմյանց հետ եւ անկեղծ հարաբերություններ մշակելու», նշել է արվեստագիտուհին, ավելացնելով, որ դուստրըՙ Մայրենին ներկայիս ուսանում է Տոկիոյում: | 
