ԼԵՎՈՆ ԱՐՈՆՅԱՆՆ ԷԼ ԴՈՒՐՍ ՄՆԱՑ ՊԱՅՔԱՐԻՑ Նորվեգիայի Տրոմսյո քաղաքում ընթացող շախմատի աշխարհի գավաթի խաղարկության 3-րդ փուլն անհաջող էր Լեւոն Արոնյանի համար: Հայ շախմատիստը 0,5-1,5 հաշվով պարտվեց Եվգենի Տոմաշեւսկուն եւ դուրս մնաց հետագա պայքարից: Վճռորոշ էր մրցակիցների առաջին պարտիան, որում հաղթեց Տոմաշեւսկին: Արոնյանն առաջին փուլում 2-0 հաշվով առավելության էր հասել Միխայիլ Մարկովի նկատմամբ: 2-րդ փուլում հայ շախմատիստը պայքարից դուրս էր մղել Իգոր Լիսիին: Դասական շախմատի 2 պարտիաներն ավարտվել էին ոչ-ոքի, իսկ արագ շախմատի մրցավեճում Արոնյանը շահել էր 2 պարտիաներն էլ: Այսպիսով, Հայաստանն այլեւս ներկայացուցիչ չունի աշխարհի գավաթի խաղարկությունում: Հայաստանի մյուս 3 պատվիրակները պայքարից դուրս էին մնացել դեռեւս առաջին փուլում: Հիշեցնենք, որ Վլադիմիր Հակոբյանը 0,5-1,5 հաշվով զիջել էր վիետնամցի Նգուեն Սոնին: Սերգեյ Մովսիսյանը դասական շախմատի 2 պարտիաներն էլ ավարտելով ոչ-ոքի, արագ շախմատի մրցախաղում 0,5-1,5 հաշվով պարտվել էր Ջոն Լյուդվիգ Համերին: Հրանտ Մելքումյանը Խուլիո Գրանդա Զունիգային զիջել էր 4-5 հաշվով: | 
