ԻՆՉՊԵՍ Է ԿՀՎ-Ն ԶԻՆՈՒՄ ՍԻՐԻԱՑԻ ԱՊՍՏԱՄԲՆԵՐԻՆ Ֆրանսիական «Ֆիգարո» թերթի տեղեկությունների համաձայնՙ ԿՀՎ-ն սիրիացի ապստամբներին զենք ու զինամթերք է մատակարարում Հորդանանի տարածքով: Հորդանանի, Սիրիայի եւ Իրաքի սահմանների մոտակայքում գոյություն ունի մի անապատային տարածք, որը ոչ պաշտոնապես կոչում է «երեք սահմանների գոտի»: Այդ տարածքում սահմանագծերը պարզապես կորչում են ավազների մեջ: Այստեղ բոլոր ժամանակներում տերուտնօրինություն են արել մաքսանենգները: Գրեթե մեկ տարի է, ինչ ամերիկյան ԿՀՎ-ն եւ դրա հորդանանյան գործընկեր GID-ը ընդհատակյա կարգով հենց այդ տարածքով են սպառազինություն մատակարարում սիրիացի ապստամբներին, վերջիններիս օգնելով նախագահ Բաշար Ասադի վարչակարգի դեմ նրանց ծավալած պատերազմում: Արեւմուտքի դաշնակից «Սիրիական ազատ բանակի» սպաներից մեկըՙ Անվարը, «Ֆիգարոյի» թղթակցին պատմել է զինամատակարարման որոշ մանրամասնություններ. «Մեր ութ ավտոմեքենաների շարասյունը մութն ընկնելու պես ճանապարհ է ընկնում սիրիա-հորդանանյան սահմանից հարավ ընկած Ռուեյշեդ բնակավայրից: Առաջին երկու Land Cruiser-ներում տեղեր են զբաղեցնում ԿՀՎ-ի գործակալները: Դրանց հետեւից շարժվում են ուրիշ հինգ ավտոմեքենաներ, որոնք լցված են լինում զենքերով: Շարասյունը եզրափակող ութերորդ մեքենայում նստում են թե՛ ԿՀՎ-ի եւ թե՛ GID-ի գործակալներ»: | 
