ՀԱՅ ՇԱԽՄԱՏԻՍՏՆԵՐԸ ՍԿՍՈՒՄ ԵՆ ԱՇԽԱՐՀԻ ՉԵՄՊԻՈՆԻ ԻՐԵՆՑ ՏԻՏՂՈՍԻ ՊԱՇՏՊԱՆՈՒԹՅՈՒՆԸ Նոյեմբերի 26-ին Թուրքիայի Անթալիա քաղաքում կտրվի շախմատի աշխարհի թիմային առաջնության մեկնարկը: Աշխարհի գործող չեմպիոն Հայաստանի տղամարդկանց հավաքականը Եվրոպայի թիմային առաջնության ավարտից անմիջապես հետո Վարշավայից ուղեւորվել է Անթալիա եւ տեղում նախապատրաստվում է Ռուսաստանի, Ուկրաինայի, Ադրբեջանի, Հոլանդիայի, Գերմանիայի, Չինաստանի, ԱՄՆ-ի, Եգիպտոսի եւ Թուրքիայի շախմատիստների հետ կայանալիք մրցախաղերին: Ի տարբերություն Եվրոպայի առաջնությունում հանդես եկած հավաքականների, միայն Գերմանիայի եւ մեր ընտրանիների կազմերն են լիովին պահպանվել: Անթալիայում էլ հայկական շախմատի պատիվը եւ աշխարհի չեմպիոնի տիտղոսը կփորձեն պաշտպանել Լեւոն Արոնյանը, Սերգեյ Մովսիսյանը, Վլադիմիր Հակոբյանը, Գաբրիել Սարգսյանն ու Տիգրան Պետրոսյանը: Իսկ ահա Եվրոպայի չեմպիոն Ադրբեջանի հավաքականի կազմում Անթալիայում չեն խաղա թիմի առաջատարներ Շահրիյար Մամեդյարովն ու Թեյմուր Ռաջաբովը, որոնց փոխարինելու են Նիջաթ Մամեդովն ու Վասիֆ Դուրարբեյլին: Ռուսաստանի հավաքականի կազմում մնացել է միայն Ալեքսանդր Գրիշչուկը, որը մասնակցել էր Եվրոպայի առաջնությանը: Թիմի կազմն ուժեղացրել են Վլադիմիր Կրամնիկն ու Սերգեյ Կարյակինը: Հանդես կգան նաեւ Նիկիտա Վիտյուգովն ու Յան Նեպոմնյաշչին: Անթալիայում Ուկրաինայի հավաքականը կգլխավորի Վասիլի Իվանչուկը: Ինչպես միշտ, ուժեղ կազմ ունի Չինաստանի հավաքականը, որը մեր գլխավոր մրցակիցներից մեկն է: ԱՄՆ-ի հավաքականի կազմում 4-րդ խաղատախտակի վրա հայտավորված է Վարուժան Հակոբյանը: Ամերիկացիներն էլ ուժեղ կազմ ունեն, որոնց առաջատարներն են Հիկարու Նակամուրան եւ Գատա Կամսկին: Շախմատի աշխարհի թիմային առաջնություններն անցկացվում են 1985-ից: Չեմպիոնի տիտղոսը վիճարկում են 10 հավաքականներ, որոնց թվում են շախմատային օլիմպիադայում լավագույն արդյունքներ ցույց տված թիմերն ու տարբեր մայրցամաքների չեմպիոնները: Անդրանիկ առաջնությունում թիմերը մրցում էին 6 խաղատախտակների վրա, հետագայում մրցումներն անցկացվեցին 4 խաղատախտակների վրա: Առաջին 6 առաջնություններն անցկացվել են 4 տարին մեկ, ընդ որում առաջին 4 մրցաշարերը կայացել են շվեյցարական Լյուցեռնում: Հետագայում աշխարհի չեմպիոնին սկսեցին ի հայտ բերել 2 տարին մեկ: Առաջին 2 մրցաշարերումՙ 1985-ին եւ 1989-ին աշխարհի չեմպիոնի տիտղոսը նվաճել է ԽՍՀՄ հավաքականը, որի կազմում էր նաեւ Ռաֆայել Վահանյանը: Հայաստանի հավաքականը բավականին հաջող է հանդես եկել աշխարհի թիմային առաջնություններումՙ 3 անգամ դառնալով բրոնզե մրցանակակիր, իսկ 2011-ին Չինաստանի Նինբո քաղաքում նվաճելով չեմպիոնի տիտղոսը: Նինբոյում Հայաստանի հավաքականի կազմն այսպիսին էր. Լեւոն Արոնյան, Սերգեյ Մովսիսյան, Վլադիմիր Հակոբյան, Գաբրիել Սարգսյան, Ռոբերտ Հովհաննիսյան: Առաջին անգամ ՀՀ հավաքականը մրցանակակիր է դարձել 1997-ին Լյուցեռնում: Մեր թիմի կազմում բրոնզե մեդալների են արժանացել Վլադիմիր Հակոբյանը, Ռաֆայել Վահանյանը, Սմբատ Լպուտյանը, Արտաշես Մինասյանը, Աշոտ Անաստասյանն ու Մելիքսեթ Խաչիյանը: 4 տարի անց Երեւանում անցկացված աշխարհի թիմային հաջորդ առաջնությունում բրոնզե հաջողությունը կրկնվեց: Թիմի կազմում էին Վլադիմիր Հակոբյանը, Ռաֆայել Վահանյանը, Սմբատ Լպուտյանը, Կարեն Ասրյանը, Աշոտ Անաստասյանն ու Արտաշես Մինասյանը: Իսրայելի Բեեր Շեւա քաղաքում 2005-ին անցկացված հաջորդ մցաշարում եւս հայ շախմատիստները բրոնզե մեդալներ նվաճեցին: Իրենց ներդրումն ունեցան Լեւոն Արոնյանը, Վլադիմիր Հակոբյանը, Կարեն Ասրյանը, Ռաֆայել Վահանյանը, Սմբատ Լպուտյանն ու Աշոտ Անաստասյանը: Հուսանք, որ Հայաստանի տղամարդկանց հավաքականին կհաջողվի Անթալիայում պահպանել աշխարհի չեմպիոնի իր տիտղոսը: | 
