ՀԱՅԱՍՏԱՆԸ ԳՆՈՒՄ Է ՎԻԼՆՅՈՒՍ, ԻՍԿ ԹԵ ԻՆՉ ՈՒ ՈՆՑ` ԴԵՌ ԿԱՍԵՆ Հայաստանի արտաքին գործերի նախարար Էդվարդ Նալբանդյանը երեկ լրագրողների հետ ճեպազրույցում տեղեկացրել է, թե նոյեմբերի 28-29-ին Վիլնյուսում կայանալիք Արեւելյան գործընկերության գագաթաժողովին Հայաստանի մասնակցության հարցը որոշված է: ԱԳՆ հաղորդագրության համաձայնՙ նախարարից հետաքրքրվել են, թե արդյոք Հայաստանը մասնակցելո՞ւ է Վիլնյուսի գագաթաժողովին եւ արդյոք հայտնի՞ է Հայաստանի պատվիրակության կազմը: Նալբանդյանն արձագանքել է, թե բոլոր մանրամասները պատշաճ ժամկետներում եւ պատշաճ կարգով կհայտնվեն: «Որոշված է, բայց կհայտնվի համապատասխան ժամկետներում». ավելին չի հաղորդել Հայաստանի արտաքին գերատեսչության ղեկավարը: Իսկ թե ի՞նչ է սպասվում, ի՞նչ պետք է կնքի Հայաստանը` նախարարն, ի պատասխան, միայն կրկնել է, թե ինչ որ լինելու է, «կիմանաք պատշաճ ժամկետներում եւ կարգով», չճշգրտելով նաեւ, թե ով է գլխավորելու Վիլնյուս մեկնող պատվիրակությունը: Հայաստանի մտադրությունների վրա Ուկրաինայի հրաժարման հնարավոր ազդեցության առնչությամբ հարցին էլ Էդվարդ Նալբանդյանը պատասխանել է. «Ամեն երկիր ինքն է որոշում, թե ինչպես է զարգացնում հարաբերությունները հարեւան երկրների հետ, տարբեր տարածաշրջանային կառույցների հետ: Ինչ վերաբերում է մեր հարաբերություններին Եվրոմիության հետ, մենք բազմիցս արտահայտվել ենք: Հայաստանը ցանկանում է շարունակել համագործակցությունը Եվրոմիության հետ բոլոր հնարավոր ուղղություններով»: Այս մասին, ըստ Նալբանդյանի, ասվել էր նաեւ այն մամլո հաղորդագրության մեջ, որը հրապարակվել էր Բրյուսելում Քեթրին Էշթոնի հետ հանդիպումից հետո: «Իսկ Քեթրին Էշթոնն իր կողմից հայտարարել էր, որ Եվրոպական միությունը ցանկանում է շարունակել համակողմանի փոխգործակցության զարգացումը Հայաստանի հետ բոլոր ուղղություններով, որոնք համատեղելի կլինեն Մաքսային միությանը անդամակցելու Հայաստանի որոշման հետ: Դրան հավելելու բան այս պահին չկա», ներկայացրել է Հայաստանի արտգործնախարարը: Եվրոմիության հետ զարգացման հեռանկարների առումով էլ նախարարը լավ հեռանկարներ է տեսնում, դրական, համագործակցությունն էլ` շարունակելի: Հարցը, թե հնարավո՞ր է, որ Ուկրաինայի հրաժարվելուց հետո Արեւելյան գործընկերության շեշտադրումը Եվրոմիության կողմից ավելի թուլանա, եւ որի մեջ է հենց Հայաստանը, այսինքնՙ Եվրոմիության հայացքը թեքվի այլ ուղղությամբ, Նալբանդյանը վերահասցեագրել է ԵՄ-ին, թե այդ հարցը պետք է ուղղել Եվրոմիությանը: Վ. Պ. | 
