ՀԱՐԳԱՆՔԻ ՏՈՒՐՔ ԱՐԱՄ ՂԱՐԱԲԵԿՅԱՆԻՆ Հ. Ծ. Առաջիկա սեպտեմբերի 21-ին Կոլբըռն վարժարանի Զիպեր դահլիճում (Լոս Անջելես) տեղի երաժշտական ընկերության բաց հիմնադրամը (ԵԱԲՀ) յուրահատուկ միջոցառմամբ հարգանքի տուրք է մատուցելու վաղամեռիկ տաղանդավոր խմբավար Արամ Ղարաբեկյանի հիշատակին: «Արմինյն Միրոր-Սփեքթեյթր» շաբաթաթերթի փոխանցմամբ միջոցառմանը մասնակցելու են Այդա Ամիրխանյանը, Նունե Բադալյանը, Սուրեն Բագրատունին, Սթիփ Ամերսոնը, Թամարա Պետրոսյանը, Արա Ղուկասյանը, Էլլա Մելիք-Հուսյանը եւ Նոնա Ալահվերդովան: Ղարաբեկյանը իր կարիերան սկսել է որպես ուսանող Բոստոնի երաժշտանոցում, այնուհետեւ շարունակել ուսումը Իտալիայում եւ Գերմանիայում: Երաժշտության հանդեպ նրա սերն ու նվիրվածությունը ակնհայտ է դարձել իր կարիերայի հենց սկզբնական շրջանից, երբ հիմնել է Բոստոնում «ՍիմֆոՆովա կամերային նվագախումբը» եւ դարձել նրա խմբավարը: Շրջել է բազմաթիվ երկրներում: Որոշակի ժամանակ որպես խմբավար աշխատել է Խորվաթիայում, Ուկրաինայում եւ այլ երկներում: Արժանացել է հեղինակավոր մրցանակների, որոնց թվում ASCAP մրցանակին 1988-ին, Լուսիեն Վուլսին կատարողական արվեստի մրցանակին (Բոստոնում) եւ Մովսես Խորենացի մեդալին Հայաստանի նախագահի կողմից: «Բոստոն Գլոբ» պարբերականը նրա ելույթները «լավագույնն» է համարել: Նրա մասին հատուկ թողարկումներ են եղել CNN եւ ռուսական «Կուլտուրա» հեռուստաալիքներով: |
