ԱԿԱԴԵՄԻԿՈՍ ԼԵՆՍԵՐ ԱՂԱԼՈՎՅԱՆԻ ՄԵՆԱԳՐՈՒԹՅՈՒՆԸՙ ԱՆԳԼԵՐԵՆ ՀՀ ԳԱԱ Տեղեկատվական-վերլուծական կենտրոն «World Scientific Publishing» (Համաշխարհային Գիտություն հրատարակչություն) հրատարակչությունը հրատարակել է ՀՀ ԳԱԱ ակադեմիկոս Լենսեր Աղալովյանի «Անիզոտրոպ սալերի եւ թաղանթների ասիմպտոտիկ տեսություն» լայնածավալ մենագրության անգլերեն տարբերակը: Գիրքը բաղկացած է 376 էջից, 11 գլխից: Գիրքը նվիրված է ժամանակակից տեխնիկայի, սարքաշինության եւ շինարարության հիմնական կոնստրուկցիաների, սարքերի եւ կառույցների բաղկացուցիչ տարրերի ամրությանը, կայունությանը եւ հուսալիությանը: Մինչեւ վերջին տասնամյակները այդ խնդիրները լուծվել են վարկածների մեթոդով: Ձողերի ու հեծանների համար ընդունվել է Բեռնուլի-Էյլերի հարթ կտրվածքների վարկածը, սալերի եւ թաղանթների համար` Կիրխհոֆ-Լյավի չդեֆորմացվող նորմալների վարկածը (դասական տեսության վարկածներ): Հայտնի են նաեւ ավելի քիչ սխալի հանգեցնող վարկածներով ճշգրտված տեսությունները (Ռայսներ, Ս.Համբարձումյան, Տիմոշենկո): Անհրաժեշտություն էր առաջացել ի հայտ բերել բոլոր այդ տեսությունների կիրառելիության շրջակները, ինչպես նաեւ գտնել կիրառությունների համար հույժ կարեւոր խնդիրների այնպիսի դասերի լուծումներ, որոնց համար վերոհիշյալ վարկածները կիրառելի չեն: Լենսեր Աղալովյանի մենագրությունը նվիրված է այդ հույժ կարեւոր հարցերի ուսումնասիրությանը: Ցույց է տրված, որ դասական եւ ճշգրտված տեսությունները, որոնք դիտարկում են միայն մեկ դասի խնդիրներ, համապատասխանում են ասիմպտոտիկ ներկայացման մեկ-երկու մոտավորություններին: Այնուհանդերձ, այդ տեսություններով ստացվող արդյունքները բավարար են լայն շրջանակի կիրառությունների համար: Լենսեր Աղալովյանի կողմից մաթեմատիկորեն ապացուցված է, որ դասական ու ճշգրտված տեսությունների վարկածները կիրառելի չեն նոր դասի եզրային խնդիրների լուծման համար: Խնդիրների այդ դասերը հիմնականն են սեյսմակայուն կառույցների հիմքերի եւ հիմնատակերի հաշվարկներում, իսկ դինամիկ խնդիրներում` շերտավոր միջավայրում սեյսմիկ ալիքների տարածման, կառուցվածքների վրա նրանց ազդեցության ուսումնասիրության հարցերում: Նրա կողմից գտնված է դասականից սկզբունքորեն տարբերվող ասիմպտոտիկա, որը թույլ է տվել լուծել այդ դասի խնդիրները: Նշված են այն դեպքերը, երբ հնարավոր է ստանալ մաթեմատիկորեն ճշգրիտ լուծումներ: Լենսեր Աղալովյանի կողմից մշակված մոտեցումը կարող է հիմք հանդիսանալ նոր տիպի կարեւոր կիրառական խնդիրներ լուծելու համար, մասնավորապես ուսումնասիրել բարակ մարմինների եւ ֆիզիկական բազմաբնույթ դաշտերի փոխազդեցության հույժ կարեւոր հարցերը: Մենագրության ռուսերեն տարբերակը հրատարակվել է , ..., հրատարակչության կողմից եւ արժանացել մասնագետների ամենաբարձր գնահատականին: | 
