ՔՐԻՍ ԿՈՌՆԵԼԻ ԱՆՎԱՆ ԿՐԹԱԹՈՇԱԿ UCLA-ՈՒՄ Հ. Ծ. Լոս Անջելեսի Կալիֆոռնիա համալսարանի իրավաբանական ֆակուլտետում մեկ միլիոն դոլարի նվիրատվությամբ ստեղծվել է Քրիս Կոռնելի անվան կրթաթոշակ, տեղեկացնում է «Արմինյն Միրոր-Սփեքթեյթր» շաբաթաթերթը հիմնվելով «Լոս Անջելես Թայմսի» հաղորդագրության վրա: Նվիրատվությունը կատարել են Կոռնելի կինըՙ Վիքին, Քրիսի ընկերներն ու UCLA-ի իրավաբանական ֆակուլտետի գործունեությունը գնահատողները: «Մենք վստահ ենք, որ հնարավորության ընձեռնման դեպքում մարդիկ կարող են փոխել աշխարհը», նշել է այդ առթիվ Վիքի Կոռնելը : Իսկ իրավաբանական ֆակուլտետի դեկան Ջենիֆեր Մնուկինը ավելացրել է. «Կրթաթոշակը նպաստելու է, որ արդարությանը հետամուտ լինելու մեր պարտավորությունն առավել հզորանա եւ Քրիսի հիշատակն էլ վառ մնա հետագա սերունդների հոգիներում»: «Խոստումը» ֆիլմի գլխավոր երգի հեղինակն ու կատարող Քրիս Կոռնելը անցյալ տարվա մայիսին, 52 տարեկանում, վաղաժամ հեռացավ այս կյանքից: Նա մարդու իրավունքների անխոնջ պաշտպան էր եւ ակտիվ գործիչ: Երգից ստացած եկամուտը փոխանցել էր «Միջազգային փրկարար կոմիտեին», մինչ ֆիլմի եկամուտը ծառայել էր UCLA-ի իրավաբանական ֆակուլտետում հիմնելու «Մարդու իրավունքների խոստում» բաժինը: | 
