ՃԱՆԱՉՎԱԾ ԲԱՐԵՐԱՐ ՀՐԱՉՅԱ ՊՈՂՈՍՅԱՆԻ ՆԱԽԱՁԵՌՆՈՒԹՅԱՄԲ ՀԱՅԱՍՏԱՆԻ ԵՎ ԵՐԵՎԱՆԻ ԴՐՈՇՆԵՐԸ ԾԱԾԱՆՎՈՒՄ ԵՆ ՏԻԵԶԵՐՔՈՒՄ ԳՈՀԱՐ ԲՈՏՈՅԱՆ, Մոսկվայում «Ազգ»-ի հատուկ թղթակից 2018-ը հայության կյանքում բեկումնային իրադարձությունների եւ արմատական փոփոխությունների տարի լինելուց բացի, նաեւ հոբելյանական է. այս տարի արդեն նշել ենք Հայաստանի առաջին հանրապետության հռչակման 100-ամյակն ու նշելու ենք Երեւանի հիմնադրման 2800-ամյակը: Բայց 2018-ը, նշանակալի եւ հոբելյանական լինելուց բացի, ինչ-որ առումով նաեւ «տիեզերական» է, եւ այս աննախադեպ նախաձեռնության հեղինակը բազմաթիվ ինքնատիպ մտահղացումներով մեզ պարբերաբար զարմանք ու հիացմունք պարգեւող անձնավորություն էՙ պետերբուրգաբնակ մեր հայրենակից, ճանաչված հասարակական գործիչ եւ բարերար Հրաչյա Պողոսյանը: Եվ ի նշանավորումն 2018-ի մեր հոբելյանական տարեդարձներիՙ Հայաստանի եւ Երեւանի դրոշները Հրաչյա Պողոսյանի սրաթռիչ մտքի արդյունքում այժմ ծածանվում են տիեզերքում` Միջազգային տիեզերական կայանում: Դրոշները տիեզերք են ուղարկվել մարտի 21-ինՙ տիեզերագնացներ Օլեգ Արտեմեւի, Էնդրյու Ֆոյթելի եւ Ռիչարդ Առնոլդի հետ: Ռուսական տիեզերանավի անձնակազմը Երկիր կվերադառնա սեպտեմբերին, իսկ արդեն հոկտեմբերինՙ Էրեբունի-Երեւան տոնակատարության 2800-ամյակի նախօրյակին, տիեզերքում «շրջագայած» դրոշները հանդիսավոր պայմաններում կհանձնվեն Հայաստանի ղեկավարներին: ԱՊՀ Միջկառավարական ասամբլեայի խորհրդի գլխավոր քարտուղարի տեղակալի խորհրդական, բարերար եւ հասարակական գործիչ Հրաչյա Պողոսյանն արդեն երկար տարիներ հայ-ռուսական բարեկամության եւ երկկողմ հարաբերությունների ամրապնդման ու սերտացման ջատագովն է, նրա հասարակական ու բարեգործական գործունեությունը լայնորեն հայտնի է ինչպես Ռուսաստանում, այնպես էլ Հայաստանում: Հրաչյան առանձնակի վերաբերմունք ունի հոգեւոր արժեքների եւ հոգեւոր խորհրդանիշների հանդեպ: Նրա բարեգործական գործունեության մեջ մեծ տեղ են զբաղեցնում Հայրենական մեծ պատերազմի հերոսների հիշատակին նվիրված հուշարձանները, նաեւ` Մեծ եղեռնի զոհերի հիշատակը հավերժացնող խաչքարերը: Պողոսյանի ջանքերով ստեղծվել են 90-ից ավելի մշակույթի, հոգեւոր եւ պատմական նշանակության կառույցներ ու հուշակոթողներ: Դրանցից 26 հուշարձան նվիրված է Հայրենական մեծ պատերազմին, 7-ը` Հայոց ցեղասպանությանը, որոնք տեղադրված են տարբեր քաղաքներում: Նրա մեկենասությամբ տպագրվել են տասնյակ գրքեր եւ ամսագրեր, ինչպես նաեւ տարբեր թեմաներով վավերագրական ֆիլմեր: Հրաչյա Պողոսյանի բարեգործության շրջանակն ընդգրկում է այսօր արդեն մեկ տասնյակից ավելի երկիր: Տիեզերագնացության հետ Հրաչյան վաղուց է առնչվել. դեռեւս 2014-ին նրա նախաձեռնությամբ եւ միջոցներով ՌԴ Ամուրի երկրամասում հանդիսավորությամբ տեղադրվել է տիեզերագնացության տեսության հիմնադիր Կոնստանտին Ցիալկովսկու կիսանդրին եւ միաժամանակՙ ֆինանսավորել է Ուգլեգորսկի տիեզերագնացության թանգարանինՙ ցուցանմուշներ ձեռք բերելու գործում եւ նրա միջոցներով նկարահանվել է «Այսօրվա անհնարինը վաղը դառնում է հնարավոր» ֆիլմըՙ նվիրված Ցիալկովսկու կյանքին եւ գործունեությանը: Ֆիլմը ցուցադրվել է Ամուրի մարզի հեռուստատեսային ալիքներով եւ արժանացել տարբեր մրցանակների: Հրաչյա Պողոսյանը, ով, ի դեպ, Ռուսաստանի տիեզերագնացության ֆեդերացիայի անդամ է, բարեգործական էլի բազմաթիվ նշանակալի ներդրումներ է կատարել տիեզերագնացության ոլորտին աջակցելու գործում: Եվ հավանաբար նաեւ այդ էր պատճառը, որ այս անգամ որոշեց Հայաստանի անունը կապել տիեզերագնացության եւ տիեզերքի հետ: - Հայաստանի հեղինակությունը անչափ թանկ է ինձ համար,-ասում է Հրաչյա Պողոսյանը: Այս տարի իմ պատմական Հայրենիքում նշվելիք երկու իրադարձությունները չէի կարող ուշադրության չարժանացնել, որոշեցի նոր անակնկալով հանդես գալ եւ տիեզերական նվեր մատուցել: Հայաստանի եւ Երեւանի դրոշները տիեզերական շրջագայության ուղարկելու մտահղացումս կյանքի կոչելու նպատակով դիմեցի Տիեզերագնացության ֆեդերացիայի Հյուսիս-Արեւմտյան մասնաճյուղի առաջին փոխնախագահ Օլեգ Մուխինին: Նա հավանություն տվեց նախաձեռնությանս` նշելով, որ հայ ժողովրդի ներդրումը տիեզերական արդյունաբերության զարգացման գործում անուրանալի է եւ հիշեցրեց, որ լուսնագնացի ինքնագնաց շասսիի առաջին նախագծողը Ալեքսանդր Քեմուրջյանը էր: Օլեգ Մուխինը նաեւ հավելել էր, որ Հրաչյա Պողոսյանն իր համար պատահական մարդ չէ, եւ որ նա բարեգործական նշանակալի ներդրումներ է կատարել տիեզերագնացության ոլորտում: Այնուհետեւ ստացվեց Ռոսկոսմոսի ղեկավարության թույլտվությունը` դրոշները տիեզերք ուղարկելու համար: Միեւնույն ժամանակ, Հրաչյա Պողոսյանը դիմել էր Հայ Առաքելական եկեղեցունՙ իր նախաձեռնության համար օրհնություն ստանալու: Ռուսաստանի եւ Նոր Նախիջեւանի հայոց թեմի առաջնորդ Եզրաս արք. Ներսիսյանի օրհնությունը ստանալուց հետո փետրվար ամսին Էջմիածնի իր նստավայրում Հրաչյա Պողոսյանին ընդունել է Ամենայն Հայոց Կաթողիկոս Գարեգին Երկրորդը: Նորին Սրբությունը ոչ միայն հավանություն տվեց նման անսովոր նախաձեռնությանը, այլեւ իր օրհնությունը տվեցՙ դրոշները տիեզերք ուղարկելու համար: - Մարտի 2-ին Մոսկվայում Հայաստանի դեսպանատանը, Սանկտ Պետերբուրգում Հայաստանի գլխավոր հյուպատոս Հրայր Կարապետյանի խնդրանքով մեզ ընդունեց ՌԴ-ում ՀՀ արտակարգ եւ լիազոր դեսպան Վարդան Տողանյանը,-պատմում է Հրաչյա Պողոսյանը: Ինձ հետ էր նաեւ ՌԴ հերոս, տիեզերագնաց-փորձարկող Օլեգ Արտեմեւը, ում այդ օրը ես եւ Վարդան Տողանյանը հանդիսավոր պայմաններում հանձնեցինք դրոշները եւ հենց Արտեմեւին էլ պատիվ էր վիճակված մեր խորհրդանիշերը հասցնել Միջազգային տիեզերական կայան: Ու մինչ Հայոց եռագույնն ու Երեւանի դրոշը սպասման եւ վերադարձի ակնկալիքով հերթական շրջափուլն էին անում տիեզերքումՙ Երկիր մոլորակի վրա, Հայաստանում տեղի ունեցան համաժողովրդական աննախադեպ իրադարձություններ, ստեղծվեց բոլորովին նոր քաղաքական իրավիճակ եւ ճակատագրական ու պատմական այս ժամանակաշրջանում մեր դրոշները Հայաստան կվերադառնան ծածանվելու եւ փողփողալու մեր Հայրենիքումՙ որպես սիրո ու համերաշխության տիեզերական վկաներ: | 
